អាមេរិកៈ កាលពីថ្មីៗនេះ មានរថយន្ត Jeep មួយគ្រឿងត្រូវបានផ្ទុះឆេះ ដោយម្ចាស់រថយន្តបានអះអាងថា វា​បណ្ដាលមកពី Samsung Galaxy Note 7 ព្រោះគាត់បានសាកថ្មនៅក្នុងរថយន្ត នៅមុនពេលកើតហេតុ។

នៅថ្ងៃនេះ ក្រុមពន្លត់អគ្គិភ័យ បានបង្ហាញរបាយការណ៍ស្រាវជ្រាវពាក់ព័ន្ធនឹងករណីផ្ទុះឆេះរថយន្តខាងលើ ដោយ​នៅក្នុងរបាយការណ៍ ក្រុមពន្លត់អគ្គិភ័យបានបញ្ជាក់ថា រកពុំឃើញភស្ដុតាងអ្វីឡើយ ដូច្នេះហើយមូលហេតុដែលបណ្ដាលឲ្យរថយន្តខាងលើផ្ទុះឆេះនោះគឺទំនងជាបណ្ដាលមកពីការសាកថ្ម Galaxy Note 7។

លោក Nathan Dornacher រស់នៅក្នុងតំបន់ St. Petersburg រដ្ឋផ្លរីដា សហរដ្ឋអាមេរិក បាន​និយាយថា លោកនឹងគ្រួសារ បានត្រៀមខ្លួនចេញដំណើរកម្សាន្ត ព្រោះវាជាថ្ងៃឈប់សម្រាក ហើយលោកបានសាកថ្ម Galaxy Note 7 នៅក្នុងរថ​យន្តម៉ាក Jeep ចំណែករូបលោក និងគ្រួសារគឺបានស្ថិតនៅក្នុងផ្ទះ។ មិនបានប៉ុន្មាននាទីផងដែរ ស្រាប​តែលោកបានឮសំឡេងផ្ទុះមួយនៅខាងមុខផ្ទះ រំពេចនោះ លោកបានចេញមកក្រៅ ក៏ស្រាបតែឃើញ​​ភ្លើង​ឆេះរថយន្តរបស់លោកតែម្ដង។

គួរបញ្ជាក់ផងដែរថា Galaxy Note 7 បានកើតមានបញ្ហានៅដើមខែកញ្ញា ដោយផ្ដើមចេញពី​ប្រទេសនៃ​ទឹក​ដី​កំណើតរបស់ខ្លួនតែម្ដង បន្ទាប់មកនៅអូស្ត្រាលី និងអាមេរិក ហើយបើតាមការអះអាងរបស់ Samsung ផ្ទាល់ បានឲ្យដឹងថា នៅអាមេរិក មានច្រើនជាង ៩០ករណី ដែល Galaxy Note 7 ផ្ទុះឆេះ៕

ទស្សនាវីដេអូភ្លើងឆេះរថយន្ត Jeep

https://youtu.be/utHRQtuzuYo