Post News Media ព័ត៌មានបច្ចេកវិទ្យា ទៀតហើយ! Samsu...

ទៀតហើយ! Samsung Galaxy Note 2 ផ្ទុះឆេះ ខណ:យន្តហោះកំពុងហោះហើរ

ឥណ្ឌា: ស្មាតហ្វូនក្រុមហ៊ុន Samsung បានផ្ទុះឆេះនៅក្នុងយន្តហោះខណ:ពេលកំពុងហោះហើរ​ ប៉ុន្តែ​ស្មាតហ្វូនដែលផ្ទុះនោះមិនមែន Galaxy Note 7 ទេគឺជា Galaxy Note 2។ នេះបើយោងតាមការ​ចេញផ្សាយរបស់សារព័ត៌មាន Reuters ចេញផ្សាយនៅថ្ងៃទី២៣ ខែកញ្ញា។

ជើងហោះហើររបស់ក្រុមហ៊ុន IndiGo ពីសិង្ហបុរី ទៅកាន់ទីក្រុង Chennai ប្រទេសឥណ្ឌា ដោយនៅខណ:ពេលកំពុងហោះហើរ ស្រាប់តែអ្នកដំណើរម្នាក់បានឃើញផ្សេងហុយចេញពី​កាបូបដាក់ឥវ៉ាន់មួយ រួចក៏បានប្រាប់ទៅកាន់សហសេវិក។ ក្រោយពេលពិនិត្យមើលក្នុងកាបូបនោះទើប​ឃើញ Galaxy Note 2 កំពុងតែឆេះ និងហុយផ្សែងយ៉ាងខ្លាំង។ ហេតុការណ៍នេះមិនបណ្ដាលឲ្យមាន​នរណាម្នាក់រងរបួសឡើយ។

អគ្គនាយកដ្ឋានអាកាសចរស៊ីវិលរបស់ប្រទេសឥណ្ឌា បានចេញសេចក្ដីជូនដំណឹងដល់​ក្រុមហ៊ុន​អាកាសចរណ៍ទាំងអស់ ឲ្យផ្ដល់ដំបូន្មានដល់អ្នកដំណើរក្នុងការបិទទូរស័ព្ទត្រកូល Galaxy Note ទាំងអស់​ក្រុមហ៊ុន​ Samsung នៅក្នុងអំឡុងពេលហោះហើរ។

គួរបញ្ជាក់ផងដែរថា Galaxy Note 7 បានកើតមានបញ្ហាផ្ទុះឆេះពេលកំពុងសាកថ្ម រហូតដល់ប្រកាស​ប្រមូលនៅជុំវិញពិភពលោកចំនួន ២.៥លានគ្រឿង ហើយតាមការបញ្ជាក់ពី Samsung បានឲ្យដឹងថា បញ្ហានេះ បានធ្វើឲ្យប្រាក់ចំណូលធ្លាក់ចុះ ៥ពាន់លានដុល្លារអាមេរិក៕

ប្រភព៖ Reuters

indigo

samsung-galaxy-note-2-fire-flight-chennai