ជប៉ុន បាននិងកំពុងផ្តោតលើការកែច្នៃដំឡូងមី ទៅជាឥន្ទន:អេតាណុល នៅក្នុងប្រទេសកម្ពុជា ដែលនឹងចូលរួមដោះស្រាយបញ្ហាទីផ្សារដំឡូងមីនៅកម្ពុជា។ នេះបើយោងតាមការឲ្យដឹងពី គេហទំព័ររបស់ក្រសួងរ៉ែ និងថាមពល។

ក្រុមហ៊ុនជប៉ុន Idemitsu Kosan ដឹកនាំដោយ លោក Takatoshi Suzuki អគ្គនាយកផ្នែកថាមពលថ្មី និងកកើតឡើងវិញ បានបង្ហាញពី គោលបំណងរបស់ក្រុមហ៊ុន ក្នុងការវិនិយោគនៅកម្ពុជា ដើម្បីកែច្នៃដំឡូងមីចម្រាញ់ឲ្យទៅជា ប្រេងឥន្ធន:អេតាណុល។

កាលពីពេលថ្មីៗនេះ លោក Hidehisa Horinouchi ឯកអគ្គរដ្ឋទូតជប៉ុន បានជួបពិភាក្សាជាមួយលោក ស៊ុយ សែម រដ្ឋមន្រ្តីក្រសួងរ៉ែ និងថាមពល ផ្តោតលើគម្រោងអភិវឌ្ឍន៍ជម្រុញ ការប្រើប្រាស់ Bio-ethanol ដើម្បីផលិតជាសារធាតុល្បាយចំហេះ លាយជាមួយប្រេងឥន្ធន:ប្រើប្រាស់សម្រាប់ដំណើរការយានយន្ត។

ការអភិវឌ្ឍនេះ ផ្តល់នូវផលចំណេញពីយ៉ាង គឺបង្កើនទីផ្សារសម្រាប់កសិករដាំដំឡូងមី ព្រមទាំងកាត់បន្ថយចំណាយលើប្រេងឥន្ធន:។

គម្រោងអភិវឌ្ឍន៍នេះ គ្រោងធ្វើឡើងនៅខេត្តបាត់ដំបង ដោយក្រុមហ៊ុនជប៉ុន ផ្តល់ផលប្រយោជន៍ដល់កសិករ តាមរយ:ការអនុវត្តផលិតកម្មតាមកិច្ចសន្យា និងផ្គត់ផ្គង់តម្រូវក្នុងស្រុកផងដែរ។

រដ្ឋាភិបាលជប៉ុន ក៏បានបង្ហាញនូវឆន្ទ:គាំទ្រដល់សហគមន៍កសិកម្មកម្ពុជា តាមរយ:ការជម្រុញការប្រើប្រាស់គ្រឿងយន្តកសិកម្ម និងបច្ចេកទេសកសិកម្មថ្មី ដែលធានានូវសុវត្ថិភាពកសិផល។

គួររម្លឹកដែរថា ក្រុមហ៊ុន SINGSONG Industrial (Cambodia) របស់ប្រទេសកូរ៉េ បានបោះទុនប្រមាណជា ៣០លានដុល្លារអាមេរិក សាងសង់រោងចក្រកែច្នៃដំឡូងមីលើផ្ទៃដីទំហំជិត ២៣ហិកតា ស្ថិតក្នុងខេត្តក្រចេះផងដែរ៕