ឪពុកម្តាយគ្រប់រូបតែងតែប្រាថ្នាចង់ឲ្យកូនរបស់ពួកគេមានប្រាជ្ញាឆ្លាតវាងវៃលើសគេ ដោយព្យាយាមប្រើថ្នាំជំនួយខួរក្បាល និងខំបំប៉នអាហារប៉ូវ ដូចជាពងក្ងាន់ជាដើម។ ប៉ុន្តែពួកគេបាន មើលរំលងពីវិធីសាស្រ្ត ដែលធម្មជាតិបានផ្តល់ឲ្យមនុស្សគ្រប់គ្នាដើម្បីធ្វើឲ្យទារកទាំងអស់កើតមកមានភាពវៃឆ្លាត។ វិធីសាស្ត្រទាំងនោះ គឺទម្លាប់ទាំង៤យ៉ាង ដូចខាងក្រោម៖

១.ឧស្សាហ៍អង្អែលទារកក្នុងផ្ទៃ
យោងតាមសិក្សាថ្មីមួយរបស់ វិទ្យាស្ថានវិទ្យាសាស្រ្ត (ហៅកាត់ថា PLOS ONE) បានរកឃើញថា នៅពេលដែលឪពុកម្តាយស្ទៀបអង្អែលទារកនៅក្នុងផ្ទៃ នោះកូនរបស់ពួកគាត់នឹងចាប់ផ្តើមមានអារម្មណ៍រីករាយ និងបង្កើនកោសិកាខួរក្បាលបានយ៉ាងល្អ។ ដូចនេះលោកអ្នកគួរតែឧស្សាហ៍ធ្វើការស្ទៀបអង្អែលទារកនៅក្នុងផ្ទៃ ជាពិសេសនៅពេលដែលទារកកំពុងមានការរើបំរះ។

២.ឧស្សាហ៍និយាយលេងជាមួយទារក
ទន្ទឹមនឹងការស្ទៀបអង្អែល ឪពុកម្តាយគួរតែបន្ថែមការនិយាយលេងពីនេះពីនោះជាមួយទារក ព្រោះការធ្វើបែបនេះបានធ្វើឲ្យពួកគេមានការវិវត្តន៍ឆាប់រហ័ស ដូចការកម្រើកដៃជើង ក្បាល និងបើកមាត់ ជាដើម។ ជាក់ស្តែងការសិក្សាបានបង្ហាញឲ្យដឹងថា ស្ត្រីដែលមិនសូវរកពេលស្ងប់ស្ងាត់ស្ទៀបអង្អែល និងនិយាយលេងជាមួយទារកក្នុងផ្ទៃ គឺកូនរបស់ពួកគាត់ ភាគច្រើនមិនសូវឆ្លាតនោះទេ។

៣.ទារកអាចរៀនភាសាបរទេស
លោកវេជ្ជបណ្ឌិត Rebekka Levis ជំនួយការសាស្រ្តាចារ្យនៃសាកលវិទ្យាល័យវេជ្ជសាស្ត្រ នៃទីក្រុងញូរយក បានឲ្យដឹងថានៅពេលដែលឪពុកម្តាយ ឧស្សាហ៍អានសៀវភៅជាភាសាបរទេស ឲ្យទារកក្នុងផ្ទៃស្តាប់ អាចធ្វើឲ្យខួរក្បាលរបស់ពួកគេរីកចំរើនខាងផ្នែកស្តាប់ និងនិយាយភាសាបរទេស។ ម្យ៉ាងទៀតទារកអាចចាប់ផ្តើមរៀនកត់សម្គាល់ ភាសាដែលម្តាយរបស់គេឧស្សាហ៍និយាយ។ ដូចនេះប្រសិនអ្នកចង់ឲ្យកូនឆាប់ចេះនិយាយភាសាអង់គ្លេស អ្នកគួរតែឧស្សាហ៍និយាយភាសាអង់គ្លេសជាមួយពួកគេ។

ម្យ៉ាងទៀត ទារកដែលមានអាយុចាប់ពី៧ខែឡើងទៅ គឺជាពេលវេលាដែលល្អបំផុតសម្រាប់បង្ហាត់បង្រៀន ព្រោះរាងកាយ និងខួរក្បាលរបស់ពួកគេបានអភិវឌ្ឍគ្រប់គ្រាន់ ដើម្បីទទួលយកចំណេះដឹងពីមនុស្សចាស់។

៤.ត្រូវតែធ្វើជាម្តាយ ដែលមានភាពសកម្ម
លោកសាស្ត្រចារ្យ Patricia K. Kuhl បានទទូចយ៉ាងមុតមាំ ឲ្យម្តាយដែលមានកូនក្នុងផ្ទៃត្រូវធ្វើខ្លួនឲ្យជាមនុស្សដែលសកម្ម កុំខ្ជិលច្រអូស ព្រោះវាអាចប៉ះពាល់ដល់អនាគតរបស់កូន នៅពេលដែលពួកគេធំពេលវ័យ។ ដូចនេះម្តាយគ្រប់រូបកុំមានទម្លាប់អសកម្ម ដោយប្រកាន់ខ្ចាប់ក្នុងចិត្តថា កូនក្នុងផ្ទៃរបស់ពួកគេកំពុងតែស្តាប់ រៀន និងចាប់ផ្តើមចងចាំនូវអ្វីខ្លួនធ្វើប្រចាំថ្ងៃ៕