ថៃៈ នៅព្រឹកថ្ងៃអង្គារនេះ ប៉ូលិសបាននិយាយថា ទាហានម្នាក់ បានស្លាប់ និង ០៣ នាក់ផ្សេងទៀតរងរបួស ដោយម្នាក់កំពុងស្ថិតក្នុងស្ថានភាពធ្ងន់ធ្ងរ បន្ទាប់ពីករណីបំផ្ទុះគ្រាប់បែកកែច្នៃមួយ នៅស្រុក Muang ក្នុងខេត្តយ៉ាឡា ភាគខាងត្បូងប្រទេសថៃ។ នេះបើយោងតាមរយៈ សារព័ត៌មានថៃ Bangkok Post ចេញផ្សាយនៅថ្ងៃទី ៣០ ខែវិច្ឆិកា ឆ្នាំ២០១៦។

ហេតុការណ៍ផ្ទុះនេះ បានកើតទ្បើងនៅវេលាម៉ោង ៥ និង២០ នាទីទៀបភ្លឺ (ម៉ោងក្នុងស្រុក) ដោយគ្រាប់បែកមួយគ្រាប់ ត្រូវបានគេផលិតក្នុងទម្រង់ជាធុងហ្គាស មានទម្ងន់ពី ២០ ទៅ ២៥ គីទ្បូក្រាម។ វាត្រូវបានគេដាក់នៅក្បែរដើមឈើមួយ នៅតាមផ្លូវទៅប៉ុស្តិ៍ត្រួតពិនិត្យសន្តិសុខ Sapan Dam ក្នុងស្រុក Muang ហើយខណៈដែលទាហានបួននាក់ បានជិះម៉ូតូធ្វើដំណើរឆ្លងកាត់ចំនុចនោះ គ្រាប់បែកកែច្នៃមួយគ្រាប់នោះ ក៏បានបំផ្ទុះទ្បើងពីចម្ងាយ៕