ជាធម្មតា ក្រុមហ៊ុន Apple តែងចេញកំណែថ្មីៗ សម្រាប់ប្រព័ន្ធ iOS របស់ខ្លួនជាបន្តបន្ទាប់ ដើម្បីកែកំហុសឆ្គងផ្សេងៗ ដែលកើតមានលើប្រព័ន្ធចាស់ ឬដាក់បន្ថែមមុខងារថ្មីៗចូល។ ហើយជារឿយៗ អ្នកប្រើប្រាស់មួយចំនួនច្រើនជួបបញ្ហានេះបញ្ហានោះ បន្ទាប់ពីពួកគេកែឡើងជំនាន់ថ្មីចុងក្រោយរួច។ សម្រាប់ iOS 10.1.1 ចុងក្រោយនេះក៏ដូច្នេះដែរ។ ពោលគឺ មានអ្នកប្រើប្រាស់មួយចំនួនដែលបានកែទូរស័ព្ទ iPhone របស់ខ្លួនឡើងដល់ជំនាន់នេះ កំពុងជួបបញ្ហាថាមពលថ្មស្រកអស់ភ្លាមៗ ហើយធ្វើឱ្យទូរស័ព្ទរបស់គេរលត់ឈឹង តែម្តង។

ក្នុងនោះមានអ្នកខ្លះ ថ្ម iPhone របស់គេប្រើសល់ ៣០% ស្រាប់តែស្រកមកដល់ ១% ភ្លាមៗ រួចក៏រលត់ឈឹង ហើយបន្ទាប់ពីពួកគេដាក់សាកថ្ម ទូរស័ព្ទក៏ឆេះវិញ ឯកម្រិតថ្មក៏ត្រឡប់មកនៅ ៣០% វិញដែរ។ មានករណីមួយទៀត អ្នកប្រើប្រាស់បិទទូរស័ព្ទចោលនៅពេលយប់ ដោយថ្មរបស់វានៅសល់ ៨០%។ លុះដល់ព្រឹកឡើង iPhone របស់គេ ស្រាប់តែបើកមិនចេញ ដោយលោតសញ្ញា No battery Charge (អស់ថ្ម) ហើយនៅពេលដែលគេដាក់សាក ថាមពលថ្មក៏លោតឡើង ៣០% ភ្លាមៗតែម្តង។

គួរបញ្ជាក់ថា Apple តែងឱ្យអតិថិជនអ្នកប្រើប្រាស់ iPhone កែប្រព័ន្ធ iOS ឡើងជំនាន់ថ្មីចុងក្រោយបំផុត ដើម្បីដោះស្រាយបញ្ហាផ្សេងៗ និងទទួលបានមុខងារបន្ថែមថ្មីៗ។ ប៉ុន្តែ កំណែថ្មីខ្លះ ក៏ពាំនាំមកជាមួយបញ្ហា ឈឺក្បាលវិលមុខដល់អ្នកប្រើប្រាស់ផងដែរ។ ដូច្នេះ បើលោកអ្នកជួបប្រទះបញ្ហាដូចនេះមែន សូមរងចាំដល់ Apple ដាក់ចេញកំណែថ្មីមួយទៀតសិន ដែលបច្ចុប្បន្នក្រុមហ៊ុនកំពុងធ្វើការសាកល្បងជំនាន់ 10.2 (beta) តែប្រសិនបើលោកអ្នកមិនទាន់កែឡើងជំនាន់ 10.1.1 បច្ចុប្បន្ននេះទេ គួរតែរងចាំដល់ជំនាន់ 10.2 ចេញសិនទៅទើបជាការប្រសើរ៕
ប្រភពព័ត៌មាន៖ dailystar