អាមេរិក: ទីភ្នាក់ងារស៊ើបការសម្ងាត់ CIA របស់អាមេរិក បានចោទរុស្ស៊ីជាអ្នកជ្រៀតជ្រែក នៅក្នុងការបោះឆ្នោតជ្រើសរើសប្រធានាធិបតីកាលពីខែមុន ដើម្បីបង្កើនឱកាសឲ្យលោក Donald Trump ទទួលបានជ័យជម្នះ។ នេះបើយោងតាមសារព័ត៌មាន CNN ចេញផ្សាយនៅថ្ងៃទី១២ ខែធ្នូ ឆ្នាំ២០១៦។
ប្រធានាធិបតីជាប់ឆ្នោតអាមេរិក លោក ដូណាល់ ត្រាំ និយាយថា ការសន្និដ្ឋានរបស់ CIA គឺជារឿងមួយ ដែលគួរឲ្យអស់សំណើច ដោយលោក Trump បានហៅការសន្និដ្ឋាននោះថា «គ្រាន់តែលេសមួយទៀត» របស់សមាជិកគណបក្សប្រជាធិបតេយ្យ បន្ទាប់ពីលោកយកឈ្នះលើអតីតរដ្ឋមន្ត្រីក្រសួងការបរទេស លោកស្រី ហ៊ីឡារី គ្លីនតុន តែប៉ុណ្ណោះ។
លោក Trump បាននិយាយកាលពីថ្ងៃអាទិត្យថា លោកមិនជឿលើរឿងនេះនោះទេ។ ប្រសិនបើអ្នកពិនិត្យមើលទៅលើអ្វីដែលទីភ្នាក់ងារ CIA បាននិយាយ មានរឿងយល់ច្រឡំជាច្រើនបង្កប់ក្នុងនោះ។ គ្មាននរណាម្នាក់ដឹងច្បាស់នោះទេ។ ពួកគេមិនដឹងទេថា ជាប្រទេសរុស្ស៊ី ឬចិន ឬនរណាម្នាក់នោះ ហេតុដូចនេះ វាក៏អាចជានរណាម្នាក់ផ្សេងក៏ថាបាន។
គួរបញ្ជាក់ដែរថា ទីភ្នាក់ងារ CIA បាននិយាយថា «ខ្លួនមានជំនឿមុតមាំថា» រុស្ស៊ីបានស្វះស្វែងជួយឲ្យលោក Trump ឈ្នះ៕
មតិយោបល់