អូស្ត្រាលី: បុរសជនជាតិអូស្រ្តាលីម្នាក់ បានទទួលរងការរលាកយ៉ាងធ្ងន់ធ្ងរ នៅផ្នែកភ្លៅខាងស្តាំរបស់គាត់ ដោយសារផ្ទុះទូរស័ព្ទ iPhone ដែលគាត់បានទិញវាប្រើរយ:ប្រាំមួយខែកន្លងមក។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២ ខែសីហា ឆ្នាំ២០១៦។

លោក Gareth Clear អាយុ ៣៦ ឆ្នាំ មកពីឆ្នេរខ្សាច់ Bondi នៅក្នុងរដ្ឋ New South Wales បានជិះទៅវិញ ទៅមកនៅលើកង់របស់គាត់ កាលពីរសៀលថ្ងៃអាទិត្យ នៅពេលនោះគាត់ បានដួលដោយចៃដន្យ សង្កត់នៅលើទូរស័ព្ទ iPhone 6 របស់គាត់ បណ្តាលឲ្យវាផ្ទុះ និងឆេះខោខ្លីរបស់គាត់។

លោកបានកត់សម្គាល់ឃើញថា មានផ្សែងចេញមុនពេល ដែលឮការផ្ទុះចេញមក ដែលបង្កឲ្យមានការរោល រលាកនៅផ្នែកភ្លៅខាងស្តាំរបស់គាត់ យ៉ាងធ្ងន់ធ្ងរ។

មកទល់ពេលនេះ គាត់បានធូរស្បើយហើយ បន្ទាប់ពីទទួលការវះកាត់ និងប្រើម៉ាស៊ីនដើម្បីទប់ស្កាត់ ការឆ្លងមេរោគនៅឯមន្ទីរពេទ្យ Royal North Shore ក្នុងទីក្រុងស៊ីដនី។

លោក Clear បានបន្ថែមទៀតថា ក្រុមហ៊ុន Apple ត្រូវបានគេស៊ើបអង្កេតពីបញ្ហានេះ ខណ:ដែលក្រុមហ៊ុន ប្រព័ន្ធផ្សព្វផ្សាយព័ត៌មាន News Corp បានទាក់ទងទៅក្រុមហ៊ុននេះ ប៉ុន្តែខាងក្រុមហ៊ុនបានបដិសេធ មិនធ្វើអត្ថាធិប្បាយលើវា៕