អាមេរិក: កាលពីថ្ងៃច័ន្ទម្សិលមិញ សហរដ្ឋអាមេរិកបានអំពាវនាវដល់ប្រទេសចិន ឲ្យមានការដោះលែងក្រុមមេធាវីនិងពួកសកម្មជនសិទ្ធិមនុស្សបួននាក់ ដែលត្រូវបានផ្តន្ទាទោសពីបទធ្វើវិទ្ធង្ស (បង្ហិនបង្ហោច) នាសប្តាហ៍មុន។ នេះបើយោងតាមការចេញផ្សាយដោយសារព័ត៌មាន Channel News Asia នៅថ្ងៃទី៩ សីហា ឆ្នាំ២០១៦។
មេធាវីលោក Zhou Shifeng និងលោក Gou Hongguo និងសកម្មជនលោក Hu Shigen និងលោក Zhai Yanmin ត្រូវកាត់ទោសដាក់ពន្ធនាគារ ក្នុងចន្លោះពី ៣ទៅ ៧ឆ្នាំកន្លះ ដោយតុលាការនៅក្នុងភាគឦសាននៃទីក្រុង Tianjin ក្នុងប្រទេសចិន។
អ្នកនាំពាក្យក្រសួងការបរទេសអាមេរិក លោកស្រី Elizabeth Trudeau បាននិយាយនៅក្នុងសេចក្តីថ្លែងការណ៍មួយថា «យើងសូមជំរុញឱ្យអាជ្ញាធរចិនឱ្យដោះលែងលោកមេធាវីនិងអ្នកការពារសិទ្ធិមនុស្ស ដែលត្រូវបានជាប់ពន្ធនាគារឬនៅក្នុងការឃុំឃាំង រួមទាំងផ្តន្ទាទោសរួចទៅហើយ»។
ការកាត់ទោសមនុស្សបួននាក់ កាលពីសប្តាហ៍មុន គឺជាការផ្តន្ទាទោសនៅក្នុងចំណោមមនុស្សរាប់សិបនាក់ ដែលបានផ្សាភ្ជាប់ទៅនឹងក្រុមមេធាវីច្បាប់នៅទីក្រុងប៉េកាំង ដែលត្រូវបានគេវាយប្រហារនៅក្នុងការបង្រ្កាបទៅលើអ្នកប្រឆាំង ចាប់ពីខែកក្កដា ឆ្នាំមុន ដោយសាររដ្ឋបាលលោកប្រធានាធិបតី Xi Jinping បានរឹតបន្តឹងការគ្រប់គ្រង និងលើកឡើងពីតម្រូវការដើម្បីបង្កើនសន្ដិសុខនិងស្ថិរភាពជាតិ។
សេចក្តីថ្លែងការណ៍របស់ក្រសួងការបរទេសនេះបានបន្តនិយាយថា មេធាវីនិងសកម្មជនរាប់សិបនាក់ផ្សេងទៀត បានចាប់ឃុំខ្លួន កាលពីថ្ងៃទី៩ ខែកក្កដា ឆ្នាំ២០១៥ រួមទាំងលោក Li Heping ត្រូវបានបន្តចាប់ឃុំខ្លួនបណ្ដោះអាសន្ន ដោយមិនបានជួបមុខគ្រួសាររបស់ពួកគេ ឬដើម្បីប្រឹក្សាផ្នែកច្បាប់នៃការជ្រើសរើសរបស់ខ្លួន។
អ្នកនាំពាក្យរូបនេះបានបន្ថែមទៀតថា យើងសូមអំពាវនាវឱ្យមានការបញ្ឈប់ជាបន្ទាន់នូវករណី ដែលបានប្រឆាំងនឹងពួកគេនិងដើម្បីរឹតបន្តឹងលើសេរីភាពនៃចលនានិងសកម្មភាពខាងវិជ្ជាជីវ:របស់ពួកគេ៕
មតិយោបល់