ម៉ាល់ត៍: ចោរប្លន់យន្តហោះលីប៊ីពីរនាក់ បានចូលប្រគល់ខ្លួនឲ្យប៉ូលិស កាលពីថ្ងៃសុក្រ បន្ទាប់ពីយន្តហោះបានចុះនៅលើកោះម៉ាល់ត៍ ហើយបានដោះលែងចំណាប់ខ្មាំងទាំងអស់ នៅលើយន្តហោះនោះ នេះតាមការបញ្ជាក់របស់នាយករដ្ឋមន្រ្តីប្រទេសម៉ាល់ត៍ លោក Joseph Muscat ។
លោក Muscat បាននិយាយថា កាលពីពេលថ្មីៗនេះ ចោរប្លន់យន្តហោះពីរនាក់ បានគំរាមកំហែងបំផ្ទុះយន្តហោះដោយគ្រាប់បែកដៃ មកទល់ពេលនេះ ត្រូវប៉ូលិសចាប់បានហើយ ដោយរកឃើញគ្រាប់បែកដៃមួយគ្រាប់ និងកាំភ្លើងខ្លីមួយដើម នៅនឹងខ្លួនរបស់ចោរ ហើយការឆែកឆេរបន្ថែមទៀត នៅលើយន្តហោះបានរកឃើញកាំភ្លើងខ្លីមួយដើមទៀត។
លោកបាននិយាយទៀតថា អាកាសយានិកនិងអ្នកដំណើរផ្សេងទៀត ក៏បានត្រូវសួរចម្លើយដើម្បីពិនិត្យបន្ថែម។ នៅពេលដែលដំណើរការសួរចម្លើយចប់ ក្នុងរយ:ពេល៣-៤ម៉ោង អ្នកដំណើរ និងអាកាសយានិក ត្រូវបានគេរៀបចំ ដើម្បីបញ្ជូនត្រឡប់ទៅកាន់ប្រទេសលីប៊ីវិញ តាមយន្តហោះមួយគ្រឿងទៀតរបស់ក្រុមហ៊ុនអាកាសចរណ៍ Afriqiyah Airways ដែលជាក្រុមហ៊ុនអាកាសចរណ៍កាន់កាប់ដោយរដ្ឋនៅក្នុងប្រទេសលីប៊ី។
លោកនាយករដ្ឋមន្រ្តីក៏បាននិយាយដែរថា ពួកអាជ្ញាធរម៉ាល់ត៍ បានបញ្ជាក់ប្រាប់ពួកចោរប្លន់យន្តហោះយ៉ាងច្បាស់ថា ពួកអាជ្ញាធរគ្មានបំណងធ្វើការចរចាទេ ប្រសិនបើចោរប្លន់ទាំងពីរនាក់នោះ មិនព្រមប្រគល់ខ្លួនតាមសម្រួលនោះ៕
ប្រភពព័ត៌មានពី BBC៖
មតិយោបល់