អាមេរិកៈ មន្ត្រីយោធាជាន់ខ្ពស់អាមេរិកម្នាក់ កាលពីថ្ងៃពុធ បានចោទប្រកាន់រុស្ស៊ីថា រំលោភលើសន្ធិសញ្ញាគ្រប់គ្រងអាវុធ ដោយលួចដាក់ពង្រាយមីស៊ីល cruise នៅទីតាំងមូលដ្ឋានដីមួយកន្លែង ខណៈដែលពាក្យបណ្តឹងនេះ ត្រូវបានវិមានក្រឹមទ្បាំងធ្វើការបដិសេធ។ នេះបើយោងតាមរយៈ សារព័ត៌មានចិនស៊ិនហួ ចេញផ្សាយនៅថ្ងៃទី៩ ខែមីនា ឆ្នាំ២០១៧។

វាជាលើកទីមួយហើយ ដែលយោធាអាមេរិក បានចោទប្រទេសរុស្ស៊ីជាសាធារណៈ ពីបទរំលោភសន្ធិសញ្ញា INF ឆ្នាំ១៩៨៧ ស្ដីអំពីកម្លាំងអាវុធនុយក្លេអ៊ែររយៈចម្ងាយមធ្យម រវាងប្រទេសទាំងពីរ ដែលបានហាមឃាត់ការធ្វើការផលិត និងបាញ់សាកល្បងអាវុធមីស៊ីលផ្លោងរយៈមធ្យម មានមូលដ្ឋាននៅលើដី។

ថ្លែងនៅក្នុង​វិមាន​រដ្ឋ​សភា Capitol Hill ឧត្តមសេនីយ៍ Paul Selva ​នាយ​អគ្គ​សេនាធិការ​រង​កងទ័ព​សហរដ្ឋ​អាមេរិក ​បាន​បញ្ជាក់​ថា ​ការ​ដាក់​ពង្រាយ​កាំជ្រួច​នៅ​នឹង​ដី​ គឺបានរំលោភ​ដល់​សន្ធិសញ្ញា​​ឆ្នាំ​១៩៨៧។ ដោយលោកអះអាងថា រុស្ស៊ី បានដាក់ពង្រាយវាជាសម្ងាត់ ក្នុងចេតនាដើម្បីបង្កការគំរាមកំហែងដល់អង្គការណាតូ។

ជុំវិញបញ្ហានេះដែរ បន្ទាប់ពីប្រព័ន្ធផ្សព្វផ្សាយអាមេរិក បានអះអាងថា កាលពីខែមុន រុស្ស៊ីបានលួចដាក់ពង្រាយមីស៊ីល cruise ជាសម្ងាត់នោះ រដ្ឋមន្ត្រីការបរទេសរុស្ស៊ី លោក Sergei Lavrov ក៏បានចេញមុខបដិសេធ ចំពោះការចោទប្រកាន់នេះ ដោយលើកទ្បើងថា «ប្រទេសរុស្ស៊ីនៅតែរក្សា និងប្ដេជ្ញាចំពោះកាតព្វកិច្ចអន្តរជាតិរបស់ខ្លួន ដោយរួមបញ្ចូលទាំងកិច្ចព្រមព្រៀង INF ផងដែរ»៕