ឥណ្ឌា: កងទ័ពជើងទឹកក្នុងប្រទេស នៅថ្ងៃសុក្រ បានឲ្យដឹងថា ខ្លួនបានជោគជ័យ សម្រាប់ការសាកល្បងដំបូងនៃប្រព័ន្ធដំឡើងថ្មី ដោយការបាញ់កាំជ្រួចមីស៊ីល ទៅលើអាកាស ចេញពីនាវាផ្ទុកយន្តហោះចម្បាំងរបស់ខ្លួន ឈ្មោះថា INS Vikramaditya ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២៥ ខែមីនា ឆ្នាំ២០១៧។

សេចក្តីថ្លែងការណ៍ផ្លូវការមួយ បាននិយាយថា ការបាញ់នេះ ត្រូវបានធ្វើឡើងនៅឯសមុទ្រអារ៉ាប់ កាលពីថ្ងៃពុធ ដើម្បីត្រៀមខ្លួន ​សម្រាប់ធ្វើប្រតិបត្តិការនៅតំបន់ដែន​សមុទ្រភាគខាងលិច ដែលដឹកនាំ​ដោយ​លោកឧត្តមនាវីឯក Girish Luthra។

ការបាញ់មីស៊ីលនេះ ជាសញ្ញាបង្ហាញពីភាពជោគជ័យ ដែលធ្វើឲ្យប្រសើរទ្បើងនូវសមត្ថភាពប្រតិបត្តិការ របស់កងនាវាជើងទឹក លើនាវាដឹកយន្តហោះចម្បាំង ដើម្បីរារាំង និងការការពារដែនសមុទ្រជាតិ។

គួរបញ្ជាក់ដែរថា នាវា​នេះ​ មាន​ទម្ងន់ ៤៤ ៥០០តោន ប្រវែង ២៨៤ម៉ែត្រ និង​ដែល​អាច​ផ្ទុក​យន្តហោះ​ខ្នាត MiG-២៩K ចំនួន ៣០គ្រឿង ព្រម​ទាំង​ដឹក​មនុស្ស​បាន ១ ៦០០នាក់៕