អាមេរិក: មន្ត្រីការពារជាតិអាមេរិកម្នាក់ នៅថ្ងៃអង្គារ បានរាយការណ៍ថា នាវាផ្ទុកយន្តហោះអាមេរិកមួយ ដែលដឹក កងទ័ពជើងទឹក បានធ្វើដំណើរឆ្ពោះទៅកាន់ឧបទ្វីបកូរ៉េមែន ចំពេលមានភាពតានតឹងកើនឡើង ប៉ុន្តែវាមិនទាន់បានជិះទៅដល់តំបន់នោះនៅឡើយទេ។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី១៩ ខែមេសា ឆ្នាំ២០១៧។

កងទ័ពវាយប្រហារជើងទឹកអាមេរិក កាលពីថ្ងៃទី៨ ខែមេសា បាននិយាយថា ក្រុមខ្លួនដែលបានធ្វើដំណើរ ដោយនាវាផ្ទុកយន្តហោះ USS Carl Vinson ឆ្ពោះទៅកូរ៉េខាងជើងនោះ គ្រាន់តែជាវិធានការប្រុងប្រយ័ត្ន ដើម្បីទប់ស្កាត់សកម្មភាពបង្កហេតុកូរ៉េខាងជើងប៉ុណ្ណោះ។

ប្រមុខមន្ទីរបញ្ចកោណ លោក Jim Mattis កាលពីថ្ងៃទី១១ ខែមេសា បានឲ្យដឹងថា នាវា Vinson គឺគ្រាន់តែធ្វើដំណើរនៅលើផ្លូវតាមឧបទ្វីបនោះប៉ុណ្ណោះ ប៉ុន្តែនៅថ្ងៃបន្ទាប់មកទៀត ប្រធានាធិបតីលោក ដូណាល់ ត្រាំ បាននិយាយថា «យើងកំពុងបញ្ជូនកងនាវាធំមួយ ដ៏មានអនុភាពខ្លាំងបំផុត» ។

ប៉ុន្តែពាក់ព័ន្ធនឹងការលើកទ្បើងខាងលើ លោក Jim Mattis នៅថ្ងៃអង្គារ បានប្រាប់ភ្នាក់ងារ AFP ថា នាវានេះ គឺធ្វើដំណើរឆ្ពោះទៅសមុទ្រភាគពាយព្យប្រទេសអូស្រ្តាលីប៉ុណ្ណោះ ហើយកងទ័ពជើងទឹក ដែលរូបថតបានបង្ហាញ នៅលើ Vinson គឺស្ថិតនៅសមុទ្រ Java នៃប្រទេសឥណ្ឌូនេស៊ីនោះទេ។

លោកបានបន្តថា «ក្រុមកងទ័ពវាយប្រហារជើងទឹកអាមេរិក កំពុងបន្តដំណើរទៅភាគខាងជើងឆ្ពោះទៅរកសមុទ្រនៃប្រទេសជប៉ុន ក្នុងរយ:ពេល ២៤ ម៉ោងបន្ទាប់ ហេតុដូចនេះ ពួកគេមិនបានឆ្ពោះដំណើរទៅក្នុងតំបន់នោះទ្បើយ ដោយសារវាស្ថិតនៅចម្ងាយរាប់ពាន់ម៉ាយពីសមុទ្រ Java ទៅកាន់សមុទ្ររបស់ជប៉ុន៕