ហ្វីលីពីនៈ កងទ័ពរដ្ឋាភិបាល បានចាប់ផ្ដើមបើកការវាយឆ្មក់ផ្លូវអាកាស ដើម្បីប្រយុទ្ធប្រឆាំងនឹងក្រុមយុទ្ធជនរបស់ពួកភេរវករ ISIS ដែលបានលាក់ខ្លួន នៅភាគខាងត្បូងទីក្រុងមួយ ដោយពួកគេបានធ្វើការវាយប្រហារនៅសប្ដាហ៍នេះ។ ដកស្រង់ប្រភពពី aljazeera ចេញផ្សាយនៅថ្ងៃទី២៦ ខែឧសភា ឆ្នាំ២០១៧។

ប្រតិបត្តិការទ្បោមព័ន្ធនៅទីក្រុង Marawi បានបង្កឲ្យមនុស្សរាប់ពាន់នាក់នាំគ្នារត់ភៀសខ្លួនចេញ ខណៈដែលប្រធានាធិបតីលោក​ Rodrigo Duterte បានជំរុញការដាក់ច្បាប់អាជ្ញាសឹកនៅតំបន់នោះ។

អ្នកនាំពាក្យយោធាលោក Lieutenant-Colonel Jo-ar Herrera កាលពីថ្ងៃព្រហស្បតិ៍ បាននិយាយថា ការវាយឆ្មក់នេះដែរ គឺធ្វើទ្បើងក្នុងគោលបំណងបោសសម្អាតពួកសកម្មប្រយុទ្ធ ដែលគេជឿថា មានរហូតដល់ ៤០ នាក់ កំពុងលាក់ខ្លួននៅទីក្រុង Marawi។

មកទល់ពេលនេះ មានពលរដ្ឋ ២០០.០០០ នាក់ហើយ បានរត់ភៀសខ្លួនចេញពីទីក្រុង Marawi ចម្ងាយប្រហែល ៨០០ គីទ្បូម៉ែត្រពីភាគខាងត្បូងរដ្ឋធានី Manila ដោយលោក Herrera បានបញ្ជាក់ថា ការចាកចេញនេះ គឺមានការជូនសេចក្ដីព្រមានដោយអាជ្ញាធរ ដើម្បីឲ្យប្រជាជនជម្លៀសខ្លួនចេញពីកន្លែងដែលមានការបំផ្ទុះគ្រាប់បែក និងប្រយុទ្ធគ្នា។

ក្នុងនោះដែរលោក ក៏បានបន្ថែមទៀតថា «យើងបានកំណត់គោលដៅ ដែលយើងត្រូវការបោសសម្អាត ហើយយើងត្រូវការដើម្បីបន្សាបសំណល់នៃក្រុមភេរវករ ក្នុងតំបន់នោះ»៕