កូរ៉េ: អនុរដ្ឋមន្ត្រីក្រួសួងការពារជាតិកូរ៉េខាងត្បូង នៅថ្ងៃច័ន្ទនេះ បាននិយាយថា ប្រទេសខ្លួនបានស្នើឲ្យមានកិច្ចចរចាយោធា ជាមួយកូរ៉េខាងជើងជាលើកដំបូងពុំធ្លាប់មានកន្លងមក ចាប់តាំងពីមានភាពតានតឹងនឹងគ្នា នៅជិតព្រំដែនប្រទេសទាំងពីរ កាលពីឆ្នាំ ២០១៥ ព្រមទាំងសកម្មភាពធ្វើតេស្តសាកល្បងនុយក្លេអ៊ែរជាបន្តបន្ទាប់ ដោយក្រុងព្យុងយ៉ាង ក្នុងប៉ុន្មានសប្តាហ៍ថ្មី ៗនេះផងដែរ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៧ ខែកក្កដា ឆ្នាំ២០១៧។

លោក Suh Choo-suk អនុរដ្ឋមន្ត្រីក្រសួងការពារប្រទេស បានប្រាប់សន្និសីទសារព័ត៌មានមួយថា «យើងស្នើសុំឲ្យមានកិច្ចចរចាយោធា ជាមួយកូរ៉េខាងជើង នៅថ្ងៃទី ២១ ខែកក្កដាខាងមុខ នៅអគាររដ្ឋបាល Tongilgak ដើម្បីបញ្ឈប់រាល់សកម្មភាពជាសត្រូវ បន្ទាប់ពីការង្កើនភាពតានតឹងផ្នែកយោធា នៅតាមបន្ទាត់ព្រំដែនយោធាប្រទេសទាំងពីរ»។

សូមជំរាបថា Tongilgak ជាអាគារដ្ឋបាលរបស់កូរ៉េខាងជើងមួយ ស្ថិតនៅភូមិ Panmunjom ដោយវាត្រូវបានប្រើជាកន្លែង សម្រាប់កិច្ចពិភាក្សាកម្រិតរដ្ឋាភិបាលកាលពីមុន។

សំណើនេះ បានធ្វើឡើងប្រហែលមួយសប្តាហ៍ បន្ទាប់ពីប្រធានាធិបតីកូរ៉េខាងត្បូង លោក មូន ជេអ៊ីន បាននិយាយថា រដ្ឋាភិបាលត្រូវការជួបសន្ទនា ជាមួយកូរ៉េខាងជើង ជាជាងការដាក់សម្ពាធបង្កភាពតានតឹង ក្នុងការទប់ស្កាត់កម្មវិធីនុយក្លេអ៊ែរ និងមីស៊ីលរបស់របបមួយនេះ៕