អាមេរិកៈ ប្រធានាធិបតីអាមេរិកលោក ដូណាល់ ត្រាំ បានឲ្យដឹងថា រាល់ការប៉ុនប៉ងគំរាមគំហែងរបស់ក្រុងព្យុងយ៉ាង នឹងត្រូវប្រឈមវិធានការក្ដៅៗរបស់អាមេរិក។ នេះបើយោងតាមសារព័ត៌មាន Spunitk ចេញផ្សាយនៅថ្ងៃទី០៩ ខែសីហា ឆ្នាំ២០១៧។

ថ្លែងប្រាប់ក្រុមអ្នកសារព័ត៌មាននៅរដ្ឋ New Jersey កាលពីថ្ងៃអង្គារ លោក ត្រាំ បាននិយាយថា «កូរ៉េខាងជើងគ្មានអ្វីអស្ចារ្យ ដែលអាចបង្កការគំរាមកំហែងដល់អាមេរិកនោះទេ ហើយប្រសិនបើរបបនេះ មានបំណងចង់វាយប្រហារដែនដីអាមេរិកមែននោះ ពួកគេនឹងត្រូវប្រឈមជាមួយវិធានការក្ដៅៗ របស់អាមេរិក ដែលពិភពលោកមិនធ្លាប់បានឃើញពីមុនមក» ។

ការលើកទ្បើងរបស់លោកប្រធានាធិបតី ត្រាំ បានធ្វើទ្បើងនៅប៉ុន្មានម៉ោងក្រោយពីកូរ៉េខាងជើង បាននិយាយថា ខ្លួនកំពុងពិចារណាធ្វើការវាយប្រហារកាំជ្រួចមីស៊ីលផ្លោងអន្តរទ្វីបរយៈចម្ងាយមធ្យម Hwasong-12 ទៅជិតកន្លែងដំឡើងយោធា ដែលជាយុទ្ធសាស្រ្តរបស់អាមេរិក នៅកោះគាម។

សូមជំរាបថា ការគំរាមវាយប្រហាររបស់កូរ៉េខាងជើង បានកើតឡើងនៅប៉ុន្មានថ្ងៃ បន្ទាប់ពីក្រុមប្រឹក្សាសន្តិសុខអាមេរិក បានជំរុញការដាក់ទណ្ឌកម្មថ្មី ទៅលើទីក្រុងព្យុងយ៉ាង ជុំវិញការបង្កើនអាវុធនុយក្លេអ៊ែររបស់ខ្លួន៕