អាមេរិក: ខណ:ដែលភាពតានតឹង នៅឧបទ្វីបកូរ៉េកាន់តែខ្លាំងទ្បើង អាមេរិក ត្រូវបានគេជឿថា នឹងមានផែនការបង្កើនចំនួនទ្រព្យសម្បត្តិយោធា ជាយុទ្ធសាស្ត្ររបស់ខ្លួន នៅលើទឹកដីកូរ៉េខាងត្បូង ដែលជាតំបន់យោធានៃប្រទេសទាំងពីរ។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី២៩ ខែកញ្ញា ឆ្នាំ២០១៧។

កាលពីថ្ងៃពុធ ប្រធានការិយាល័យសន្តិសុខជាតិកូរ៉េខាងត្បូង បានប្រាប់សមាជិកសភាក្នុងប្រទេសថា អាមេរិកបានសន្យាថា នឹងបង្កើនការដាក់ពង្រាយប្រព័ន្ធអាវុធ ដែលជាយុទ្ធសាស្រ្តរបស់ខ្លួន នៅជិតឧបទ្វីបកូរ៉េ បន្ទាប់ពីប្រទេសទាំងពីរ បានព្រមព្រៀងគ្នាចុះហត្ថលេខា ដើម្បីបញ្ជាក់ពីកាតព្វកិច្ចរបស់អាមេរិក ក្នុងការធ្វើឲ្យប្រសើរទ្បើងនូវការសន្យារបស់ខ្លួន។

សូមជំរាបថា ទ្រព្យសម្បត្តិយោធាជាយុទ្ធសាស្ត្រទាំងនោះ រួមមាននាវាផ្ទុកយន្តហោះចម្បាំង, នាវាមុជទឹកបំផ្ទុះគ្រាប់បែកនុយក្លេអ៊ែរ ប្រភេទ Ohio-class, យន្តហោះទម្លាក់គ្រាប់បែក B-2 Spirit និង F-22 Raptors ជាយន្តហោះចម្បាំងដែលមានសមត្ថភាពខ្លាំងក្លាបំផុតក្នុងលោក និង ជាប្រភេទយន្តហោះបំបាំងកាយរបស់អាមេរិក។

សម្រាប់ប្រភេទ Ohio-class នីមួយៗ ផ្ទុកទៅដោយមីស៊ីលផ្លោងអន្តរទ្វីប D-5 Trident ចំនួន ២០ ដើម ដែលក្នុងមួយដើម អាចផ្ទុកក្បាលគ្រាប់នុយក្លេអ៊ែររហូតដល់ចំនួន ១២ គ្រាប់ ៕