អេស្ប៉ាញៈ មេដឹកនាំកាតាឡានលោក Carles Puigdemont បាននិយាយថា ទីបំផុតតំបន់កាតាឡាន ដែលស្ថិតក្រោមការគ្រប់គ្រងរបស់អេស្ប៉ាញ បានឈ្នះសិទ្ធិក្នុងការបង្កើតជារដ្ឋឯករាជ្យពេញលេញ បន្ទាប់ពីការធ្វើប្រជាមតិដ៏មានភាពចម្រូងចម្រាស ជាមួយនឹងអំពើហិង្សា។ នេះបើយោងតាមសារព័ត៌មាន BBC ចេញផ្សាយនៅថ្ងៃទី០២ ខែតុលា ឆ្នាំ២០១៧។

លោកបានបញ្ជាក់ថា សម្រាប់ពេលនេះ ទ្វារត្រូវបានបើកឲ្យមានការប្រកាសឯករាជ្យពីឯកតោភាគី ខណៈមន្រ្តីកាតាឡាន បានឲ្យដឹងថា ៩០% នៃអ្នកដែលបានបោះឆ្នោតប្រជាមតិ បានគាំទ្រឲ្យតំបន់មួយនេះ ក្លាយជារដ្ឋមានឯករាជ្យភាព ជាមួយនឹងវត្តមានអ្នកទៅបោះឆ្នោតមានចំនួន ៤២,៣% កាលពីថ្ងៃអាទិត្យ ។

តុលាការធម្មនុញ្ញអេស្ប៉ាញ បានប្រកាសថា ការបោះឆ្នោតនេះ គឺជាទង្វើខុសច្បាប់ហើយ ខណៈមនុស្សរាប់រយនាក់ បានរងរបួសនៅពេលដែលប៉ូលិសប្រើកម្លាំង ដើម្បីរារាំងការបោះឆ្នោតនេះ ដោយពួកគេបានរឹបអូសសន្លឹកឆ្នោត និងប្រអប់សន្លឹកឆ្នោត នៅការិយាល័យបោះឆ្នោត។

លោក Puigdemont បាននិយាយនៅក្នុងការផ្សាយតាមទូរទស្សន៍មួយ ជាមួយនិងក្រុមមេដឹកនាំជាន់ខ្ពស់កាតាឡានដទៃទៀតថា « ជាមួយនឹងថ្ងៃនៃក្តីសង្ឃឹម និងការឈឺចាប់នេះ ប្រជាពលរដ្ឋកាតាទ្បាន បានឈ្នះសិទ្ធិក្នុងការបង្កើតជារដ្ឋឯករាជ្យភាពមួយ នៅក្នុងទម្រង់សាធារណរដ្ឋ ហើយលោកនឹងបញ្ជូនលទ្ធផលនៃការបោះឆ្នោតនេះ ទៅកាន់រដ្ឋកាតាឡាន ដែលជាអធិបតេយ្យរបស់ប្រជាជនរបស់យើង ស្របតាមច្បាប់នៃការធ្វើប្រជាមតិ៕