កូរ៉េ: រដ្ឋាភិបាលក្រុងព្យុងយ៉ាង កាលពីថ្ងៃអាទិត្យ បានព្រមានប្រឆាំងទៅនឹងការប្រើពាក្យសម្ដីមិនចេះក្រែងរបស់ លោក ដូណាល់ ត្រាំ នៅអំទ្បុងពេលចាប់ផ្តើមដំណើរទស្សនកិច្ចប្រធានាធិបតិអាមេរិក មកកាន់តំបន់អាស៊ី ទាក់ទងនឹងការគំរាមកំហែងអាវុធនុយក្លេអ៊ែរ របស់ក្រុងព្យុងយ៉ាង។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៦ ខែវិច្ឆិកា ឆ្នាំ២០១៧។

កាសែតរដ្ឋ​កូរ៉េ​ខាងជើង Rodong Sinmun បានឲ្យដឹងថា ការនិយាយចោទប្រកាន់របស់លោក ត្រាំ មកលើកូរ៉េខាងជើង នឹងជំរុញឲ្យមានភាពតានតឹងកាន់តែខ្លាំងទ្បើង ដែលអាចនាំមកនូវគ្រោះមហន្តរាយនុយក្លេអ៊ែរ ទៅដល់ដីគោករបស់អាមេរិក។

លោក ត្រាំ ដែលត្រូវបានគេដឹងថា នឹងត្រូវធ្វើដំណើរទស្សនកិច្ចមកកាន់កូរ៉េខាងត្បូង នៅសប្តាហ៍នេះ បានបង្កឲ្យមានសង្រ្គាមពាក្យសម្ដី កាន់តែក្ដៅគគុក ជាមួយមេដឹកនាំកំពូលកូរ៉េខាងជើង ដោយរូបលោក បានគំរាមកំហែងផ្នែកពាណិជ្ជកម្ម និងការប្រើសម្ដីបំពានផ្ទាល់មាត់ទៀតផង។

គួររំឭកថា នៅក្នុងសុន្ទរកថាជាលើកដំបូងរបស់លោក ត្រាំ នៅចំពោះមហាសន្និបាតអង្គការសហប្រជាជាតិ លោកបានគំរាមកំហែង វាយកម្ទេចប្រទេសកូរ៉េខាងជើងឲ្យទៅជាផេះ ក្នុងករណីប្រសិនបើរបបមួយនេះ ហ៊ានវាយប្រហារអាមេរិក ឬសម្ព័ន្ធមិត្តរបស់ខ្លួន៕