កូរ៉េៈ ទីភ្នាក់ងារព័ត៌មានរដ្ឋរបស់កូរ៉េ KCNA បានរាយការណ៍នៅថ្ងៃពុធនេះថា កូរ៉េខាងជើង បានបញ្ជាក់ពីភាពជោគជ័យរបស់ខ្លួន នៅក្នុងការបាញ់សាកល្បងមីស៊ីលផ្លោង​អន្តរទ្វីប ឈ្មោះថា Hwasong-15 ដោយបានអះអាងថា វា​មានសមត្ថភាពអាច​បាញ់​ដល់គ្រប់ទីតាំងទាំងអស់ នៅលើទឹកដីអាមេរិក។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២៩ ខែវិច្ឆិកា ឆ្នាំ២០១៧។

តាមរយៈការផ្សាយរបស់ទូរទស្សន៍ KCNA បានឲ្យដឹងថា មីស៊ីលផ្លោងអន្តរទ្វីប (ICBM) ដែលក្រុងព្យុងយ៉ាងបានធ្វើតេស្តនេះ គឺជាអាវុធដ៏មានសក្ដានុពលបំផុត ដែលវាអាចហោះហើរបានចម្ងាយ ៩៥០ គីឡូម៉ែត្រ ក្នុងរយៈពេល ៥៣ នាទី ជាមួយនឹងរយៈកម្ពស់ ៤,៤៧៥ គីឡូម៉ែត្រ។

ប្រភពដដែលបានបន្ថែមថា មេដឹកនាំកំពូលកូរ៉េខាងជើង លោក គីម ជុងអ៊ុន បានបញ្ជាឲ្យចាប់ផ្តើមការសាកល្បងមីស៊ីលទាំងអស់ ឲ្យស្ថិតនៅក្នុងជួរបាញ់ទៅកាន់សហរដ្ឋអាមេរិក។

សូមជំរាបថា ការប្រកាស​ជោគជ័យ​​របស់​កូរ៉េខាងជើង បានកើតមានឡើងបន្ទាប់ពីយោធា​អាមេរិក និងកូរ៉េខាងត្បូងអះអាងថា ប្រទេសឯកោមួយនេះ នឹងបាញ់សាកល្បង​មីស៊ីលមួយគ្រាប់​ នៅព្រឹកថ្ងៃពុធនេះ​ ទៅធ្លាក់នៅឯសមុទ្រខាងកើត ជាតំបន់​សេដ្ឋកិច្ចផ្ដាច់មុខ​របស់ជប៉ុន៕