Post News Media ព័ត៌មានអន្តរជាតិ ការភ័យខ្លាចពី...

ការភ័យខ្លាចពីទឹកជំនន់កាន់តែរីករាលដាល នៅមីយ៉ាន់ម៉ា ខណ:មនុស្ស ១៣០ ពាន់នាក់ ត្រូវបានជម្លៀសខ្លួនចេញ

មីយ៉ាន់ម៉ា: ការព្រួយបារម្ភថា ទំនប់ការពារទឹក អាចនឹងត្រូវបាក់រលំ ដោយសារភ្លៀងធ្លាក់នាពេលថ្មីៗ បានបង្កជាទឹកជំនន់ កាលពីថ្ងៃពុធ នៅភាគអាគ្នេយ៍ប្រទេសមីយ៉ាន់ម៉ា ជាទីដែលមនុស្សជាង ១៣០,០០០ នាក់ ត្រូវបានបង្ខំឲ្យចាកចេញពីផ្ទះសម្បែងរបស់ពួកគេ បន្ទាប់ពីមនុស្ស ១២ នាក់បានស្លាប់បាត់បង់ជីវិត។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២ ខែសីហា ឆ្នាំ២០១៨។

មកទល់ពេលនេះ តំបន់ដីដ៏ធំល្វឹងល្វើយ នៅតាមបណ្តាខេត្តចំនួន ៤ ស្ថិតនៅក្រោមទឹកភក់ ដោយក្រុមជួយសង្គ្រោះ កំពុងព្យាយាមទៅកាន់ភូមិ ដែលរងផលប៉ះពាល់ តាមទូកដើម្បីផ្តល់អាហារដល់ជនរងគ្រោះ ឬអ្នកដែលបានបដិសេធ ក្នុងការចាកចេញពីផ្ទះរបស់ពួកគេ។

នៅពីលើទីប្រជុំជន Madauk ក្នុងតំបន់ Bago ទឹកជំនន់តែប៉ុន្មានអ៊ីងទៀតប៉ុណ្ណោះ នឹងទ្បើងផុតពីមាត់គែមនៃទំនប់ការពារទឹក ដែលនៅទីនោះងាយនឹងទទួលរងគ្រោះបំផុត ខណ:អ្នកស្រុក កំពុងតែភ័យខ្លាចថា ភ្លៀងមូសុង អាចនឹងបង្កជាគ្រោះមហន្តរាយ។

មេដឹកនាំក្រុមជួយសង្គ្រោះលោក Hlaing Min Oo បានប្រាប់ភ្នាក់ងារ AFP ថា ប្រសិនបើទំនប់នេះ មិនអាចទប់ទល់នឹងទឹកជំនន់នេះបាន នោះភូមិជាច្រើនទៀត នឹងមានហានិភ័យខ្ពស់ ដោយលោកបានបញ្ជាក់ថា នៅពេលនេះ ក្រុមអ្នកស្ម័គ្រចិត្ត ដើម្បីជួយសង្គ្រោះ កំពុងដឹកសម្ភារតាមទូក ក្នុងនោះរួមមានម្ហូបអាហារ សម្រាប់ជនរងគ្រោះ ដោយទឹកជំនន់ផងដែរ៕