បរទេស: យោងតាមការធ្វើបច្ចុប្បន្នភាព នៅបារាំង និងអ៊ីតាលី បានកត់សម្គាល់ឃើញថា ចំនួនអ្នកស្លាប់ ដោយសារវីរុសឆ្លងកូរ៉ូណា នៅក្នុងប្រទេសរបស់ពួកគេ មានការថយចុះ គឺតួលេខទាបបំផុត ក្នុងរយ:ពេលមួយ និងពីរសប្តាហ៍កន្លងទៅ។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី៦ ខែមេសា ឆ្នាំ២០២០។

ទន្ទឹមគ្នានេះដែរ នាយករដ្ឋមន្រ្តីអង់គ្លេស លោក Boris Johnson ត្រូវបានគេបញ្ជូនទៅមន្ទីរពេទ្យ ដើម្បីធ្វើតេស្ត បន្ទាប់ពីរយ:ពេល ១០ ថ្ងៃមកនេះ មានការចេញរោគសញ្ញានៃវីរុសឆ្លងកូរ៉ូណា ក្រោយពីរូបលោក បានធ្វើតេស្តបញ្ជាក់ថា វិជ្ជមានកូវីដ១៩។

ស្របពេលដែលប្រធានាធិបតីអាមេរិក លោក ដូណាល់ ត្រាំ បានព្រមានថា អាមេរិក កំពុងឈានដល់អ្វីដែលធ្ងន់ធ្ងរបំផុត នៅក្នុងសប្តាហ៍របស់ខ្លួន ដោយរដ្ឋញូវយ៉ក បានរាយការណ៍ថា មានអ្នកស្លាប់ថ្មីចំនួន ៥៩៤ នាក់ និងករណីអ្នកឆ្លងវីរុសកូរ៉ូណាចំនួន ៨,៣២៧ នាក់ ក្នុងរយ:ពេលត្រឹម ២៤ ម៉ោងប៉ុណ្ណោះ។

សូមជំរាបថា ចំនួនអ្នកស្លាប់ ដោយសារជំងឺឆ្លងកូវីដ ១៩ នៅទូទាំងពិភពលោកលើសពី ៦៨,០០០ នាក់ហើយ នេះបើយោងតាមទិន្នន័យ ដែលត្រូវបានចងក្រង ដោយសាកលវិទ្យាល័យ Johns Hopkins និងចំនួននៃការឆ្លងបានកើនឡើងលើស ១.២៦ លាននាក់ឯណ្ណោះ៕