ទន្ទឹមជាមួយនឹងព័ត៌មានលោក សុវណ្ណ មករា កំពុងផ្ទុះ ពាក់ព័ន្ធនឹងស្នេហាត្រីកោណ នោះ ស្រាប់តែមានមតិលើកឡើងបន្ត ពាក់ព័ន្ធរឿងនេះថាវាជាមូលហេតុមួយ ដែលធ្វើឲ្យតារាស្រីល្បីលឿន ហើយការល្បីរបស់តារាស្រីមួយចំនួនទៀតសោត តាមរយ:ចំណងស្នេហ៍ ជាមួយនឹងអ្នកដឹកនាំសម្តែង ។
មានការលើកឡើងដូច្នោះបន្ទាប់ពីមានបទ«សង្សារគីមី» របស់ ករុណា ពេជ្រ កំពុងផ្ទុះលើបណ្តាញអនឡាញហ្វេសប៊ុក ហើយក៏លេចឭថា រឿងរ៉ាវក្នុងបទចម្រៀងមួយនេះ គឺជារឿងពិតរបស់អ្នកដឹកនាំសម្តែងតែម្តង ។
ទោះជាយ៉ាងណា ឆ្លើយតបក្នុងន័យបដិសេធ ក្នុងជំនួប ជាមួយនឹងគេហទំព័រ Post News កាលពីពេលកន្លងទៅថ្មីៗនេះ លោក វ៉ាត់ លីម៉េង ដែលជាអ្នកនាំសម្តែងក្នុងបទ សង្សារគីមី បានឆ្លើយដាច់អហិង្ការ ថាសាច់រឿងនេះ ជារឿងពិត ប៉ុន្តែមិនមែនជារឿងរបស់លោកនោះទេ វាជារឿងរបស់អ្នកដឹកនាំសម្តែងម្នាក់ផ្សេងទៀត ដែលមានស្នេហា ជាមួយតួស្រី តែត្រូវបានគេសំុបែក ។
ប៉ុន្តែអ្វីដែលធ្វើឲ្យគេចាប់អារម្មណ៍បំផុត ត្រង់ប្លង់ តារាសម្តែង សាវិន ហ្វីលីព និងកញ្ញា លីឡា ជាសង្សារនិងគ្នា ហើយពេលនោះ តួប្រុស បាននិយាយថា «បងឭច្រើនគ្នាហើយណា អាអ្នកដឹកនាំសម្តែងកុន ស្រឡាញ់តែតួស្រីហ្នឹង» ។
វាមិនមែនជារឿងលើកដំបូងនោះទេ ដែលចំណងស្នេហារវាងអ្នកដឹកនាំសម្តែង និង តារាស្រីក្នុងពិភពសិល្ប: លេចឭខ្ជរខ្ជាយ ទៅកាន់សាធារណជន ខណ:កន្លងទៅ លោក សាន វិសាល ដែលជាពិធីករ និងជាអ្នកដឹកនាំសម្តែងផងដែរ នោះ ក៏លេចនូវព័ត៌មានថា មានចំណងស្នេហ៍ ជាមួយតួស្រី ក្នុងរឿង «រនាតស្នេហ៍» រហូតដល់មានកូនស្រីមួយ ។
នៅមានអ្នកដឹកនាំសម្តែង ជាច្រើនទៀតក៏មានចំណងស្នេហ៍ ជាមួយតួស្រី ដែលធ្វើឲ្យចៅកែ ផលិតកម្មខ្លះ ឈឺក្បាលនឹងបញ្ហានេះ និង ជាចំណុចមួយដែលមិនអាចបិទបាំងបាន ដូចសុភាសិតខ្មែរលើកឡើងថា «ភ្លើងមិនអាចខ្ចប់ក្រដាស» ឬ «ដំរីងាប់ មិនអាចយកចង្អេរបិទបាំងជិតនោះទេ» ។ ម្យ៉ាងវិញទៀត បញ្ហាចំណងស្នេហ៍បែបនេះ វាកំពុងធ្វើឲ្យ តារាស្រីរលកក្រោយខ្លះ លើកហេតុផលនេះឡើង មិនហានចូលក្នុងរង្វង់សិល្ប:ព្រោះតែខ្លាច គ្មានអ្វីជារង្វាន់ពិសេសជូនដល់គេ ហើយបើមិនឲ្យនោះវានឹងមិនឲ្យយើងឆាប់ល្បីនោះទេ៕
ទស្សនាវីដេអូឃ្លិបដូចខាងក្រោមនេះ៖
មតិយោបល់