ព័ត៌មានសិល្បៈ និងកម្សាន្ត

មុត ថារី ថ្ងូររឿងវិនិយោគជីវិត ក្នុងរឿង«ដួងច័ន្ទដួងចិត្ត»

កាលពីព្រឹកថ្ងៃទី៨ មករា ផលិតករល្បីឈ្មោះ លោក មុត ថារី បានប្រដាក់ដំណើរការថតរឿងភាគវីដេអូមួយថ្មីភ្លាមៗ បន្ទាប់ពីភាពយន្តរបស់លោក ក្រោមចំណងជើងថា «ក្រមុំឆ្នាស់ប៉ះមេស្រុកឆ្នើម» ទើបតែដាក់បញ្ចាំងនៅលើកញ្ចក់ទូរទស្សន៍ PNN បានប៉ុន្មានភាគបើកឆាក។ ភាពយន្តដែលលោក ទើបតែប្រកាសចេញថតនេះ គឺមានចំណងជើងថា «ដួងច័ន្ទដួងចិត្ត» ដោយក្នុងភាពយន្តនេះ គឺលោកប្រកាសថា បានសម្រេចចិត្តវិនិយោគជីវិតរបស់លោក ក្នុងពេលផលិតតែម្ដង គឺមិនមែនផលិតផង មានពេលវេលាផ្ទាល់ខ្លួនផងឡើយ។

ថ្លែងនៅក្នុងផលិតកម្មចក្រវាទ្បពេជ្រ ដែលលោកបម្រើការឲ្យក្នុងការផលិតរឿងនេះ លោកអះអាងថា ក្នុងការផលិតរឿង លោកមិនអាចផលិតបានច្រើនជាង២រឿង សម្រាប់រឿងភាគនោះទេ បើទោះជាផលិតករខ្លះ បានអះអាងពីការផលិតបានច្រើនរឿង នៅក្នុងមួយឆ្នាំៗយ៉ាងណាក៏ដោយ។ ឆ្លងតាមបទពិសោធន៍ក្នុងរឿង «ក្រមុំឆ្នាស់ប៉ះមេស្រុកឆ្នើម» គឺលោកអត់ពេលវេលាផ្ទាល់ខ្លួននោះទេ ដោយសូម្បីតែការងារនៅឯក្រសួង និងការងារផ្ទាល់ខ្លួនផ្សេងទៀត ក៏លោកប្រមូលយកមកវិនិយោគក្នុងការផលិតរឿងអស់ដែរ ទើបលោកបញ្ជាក់ថា សម្រាប់ការផលិតរឿង «ដួងច័ន្ទដួងចិត្ត» ដែលគ្រោងចំណាយទុនអស់១០ម៉ឺនដុល្លារ និងជារឿងរបស់ទូរទស្សន៍ PNN មួយនេះ ក៏ពិតជាធ្វើឲ្យមិនមានពេលវេលាផ្ទាល់ខ្លួនដូចគ្នា។

រៀងរាល់ថ្ងៃច័ន្ទ ដល់ថ្ងៃព្រហស្បតិ៍ លោកត្រូវចុះថតជាមួយការផលិតតាំងពីព្រឹកទល់យប់ ហើយនៅថ្ងៃ៣ថ្ងៃចុងសប្ដាហ៍ គឺលោកត្រូវដើរមើលប្លង់ ដើម្បីចេញថតបន្ត និងត្រូវអង្គុយកាត់ត ដោយមិនចេះតែបណ្ដោយឲ្យក្រុមការងារផលិតជាអ្នករាប់រង ហើយទើបមកសើរើចុះឡើងៗ នាំឲ្យមានការខាតពេលនោះទេ។ លោកថាការផលិតរឿង «ដួងច័ន្ទដួងចិត្ត»របស់PNN លើកនេះ គឺជារឿងទី១សម្រាប់ឆ្នាំ២០១៨ តែជារឿងទី២សម្រាប់ការចាប់ដៃជាមួយ PNN បន្ទាប់ពីលោកវិលមកផលិតរឿង ហើយធ្វើជាអ្នកដឹកនាំផលិតឲ្យផលិតកម្មចក្រវាទ្ប។

លោកគម្រោងចំណាយពេល៦ខែសម្រាប់ការផលិតរឿងភាគថ្មីនេះ ដោយលោកនិយាយថាក្នុងរយ:ពេលនៃការផលិត គឺលោកមិនខុសពីកម្មករកុន ដែលអត់សូម្បីតែពេលវេលាសម្រាប់រឿងរ៉ាវផ្ទាល់ខ្លួននោះទេ។ នៅក្នុងរឿងភាគនេះ លោកបានជ្រើសយកកូនប្រុសរបស់លោក គឺលោក មុត ដារ៉ីរិទ្ធីយ៉ា ឲ្យសម្ដែងផងដែរ តែលោកបានឲ្យគេសម្ដែងត្រឹមជាតួរងក្នុងរឿងប៉ុណ្ណោះ ដោយមិនបានលើកបន្តុប ឲ្យក្លាយជាតួឯកនោះឡើយ បើទោះជាកូនប្រុសរបស់លោកម្នាក់នោះ ត្រូវគេស្គាល់ថា ធ្លាប់បានសម្ដែងរឿងឲ្យផលិតកម្មផ្សេងរួចមកហើយ។

លោកមុត ថារី បញ្ជាក់ភាពយន្តភាគរឿង «ដួងច័ន្ទដួងចិត្ត» លោកនឹងធ្វើឲ្យហើយក្នុងរយ:ពេល៤ខែ ដើម្បីអាចដាក់បញ្ចាំងនៅលើកញ្ចក់ទូរទស្សន៍ PNN នៅអំឡុងពាក់កណ្ដាលឆ្នាំ បន្ទាប់ពីរឿង «ក្រមុំឆ្នាស់ប៉ះមេស្រុកឆ្នើម»ដែលជារឿងទី១ របស់លោកនៅ PNN ដូចគ្នាទើបបានដាក់ផ្សាយ ហើយទទួលបានការគាំទ្រនាពេលនេះ។

នៅក្នុងភាពយន្តថ្មីរបស់លោក គេឃើញមានតារាសម្ដែងភាគច្រើនជាតួសម្ដែង ដែលបានសម្ដែងក្នុងរឿង«ក្រមុំឆ្នាស់ប៉ះមេស្រុកឆ្នើម» ដោយមានតែតួឯកប្រុស និងតួសំខាន់មួយចំនួនប៉ុណ្ណោះ ដែលមានការដោះដូរ។ តារាសម្ដែងនៅក្នុងភាពយន្តនេះ រួមមាន អ្នកនាងស្វែង សុជាតា លោកគង់ សុភី លោកអែតវីន កញ្ញា ពៅ លីដា លោកពៅ ពិសិដ្ឋ លោកមុត ដារីរិទ្ធីយ៉ា កញ្ញា លឹម មួយហ្គិច កញ្ញា ភី សម័យ និងតារាសម្ដែងប្រុសស្រីល្បីឈ្មោះជាច្រើនរូបទៀត។ ភាពយន្តនឹងដំណើរការចេញថត ក្រោយចប់ពិធីក្រុងពាលី ដោយទីតាំងចេញថតភាគច្រើន គឺមានទាំងនៅភ្នំពេញ និងខេត្តមួយចំនួន៕

មតិយោបល់