ព័ត៌មានជាតិ

តុលាការនឹងបើកសវនាការ រឿងឃាតកម្មលោក កែម ឡី នៅដើមខែក្រោយ

ភ្នំពេញ:​ បើយោងតាមសេចក្តីជូនដំណឹងរបស់សាលាដំបូងរាជធានីភ្នំពេញ ចុះថ្ងៃទី៦ ខែកុម្ភ: ឆ្នាំ២០១៧ បានបញ្ជាក់ថា តុលាការគ្រោងនឹងបើកសវនាការជាសាធារណ: សំណ៊ំរឿងឃាតកម្មលើលោក បណ្ឌិត កែម ឡី នៅព្រឹកថ្ងៃទី១ ខែមីនា ឆ្នាំ២០១៧ខាងមុខ នៅបន្ទប់សវនាការទី១។

ជនជាប់ចោទនៃសំណុំរឿងនេះមានឈ្មោះ អឿត អាង ហៅ ជួប សំលាប់ ភេទប្រុស ភេទប្រុស កើតថ្ងៃទី១០ ខែធ្នូ ឆ្នាំ២០១៦ ត្រូវបានចោទប្រកាន់ពីបទ ឃាតកម្មគិតទុកជាមុន និងបទ កាន់កាប់អាវុធដោយគ្មានការអនុញ្ញាត យោងតាមមាត្រា ២០០ និងមាត្រា ៤៩០ នៃក្រមព្រហ្មទណ្ឌ។

សេចក្តីជូនដំណឹងដដែលបាមបញ្ជាក់ថា សមាសភាពជំន៊ំជម្រះនៃសំណុំរឿងនេះរួមមាន៖
១-លោក លាង សំណាត់ ជាចៅក្រមជំនុំជម្រះ
២-លោក លី សុផាណា ជាតំណាងអយ្យការ
៣-លោក សុខ សេង ជាក្រឡាបញ្ជី

ទោះយ៉ាងណា សវនាការនេះនៅមិនទាន់មានមេធាវីការពារសិទ្ធិឱ្យជនជាប់ចោទ នៅមិនទាន់មាននៅឡើយ ដោយតុលាការបញ្ជាក់ក្នុងសេចក្តីជូនដំណឹងថាកំពុងតែស្នើសុំ ខណ:ដែលលោកស្រី ប៊ូ រចនា ជាភរិយាលោកបណ្ឌិត កែម ឡី ត្រូវបានគេបញ្ជាក់ថា ជាដើមបណ្ដឹងរដ្ឋប្បវេណី។

គួររំលឹកថា ជនជាប់ចោទឈ្មោះ អឿត អាងជួប សំលាប់ ភេទប្រុស អាយុ ៣៨ឆ្នាំ បានបាញ់សំលាប់ជនរងគ្រោះឈ្មោះ កែម ឡី ភេទប្រុស អាយុ៤៦ឆ្នាំ មុខរបរ ប្រធានអង្គការអភិវឌ្ឍន៍សង្គម មានទីលំនៅផ្ទះលេខ០៨E0 ផ្លូវលេខ៣៩២ សង្កាត់បឹងកេងកង១ ខណ្ឌចម្ការមន រាជធានីភ្នំពេញ នៅក្នុងស្តារម៉ាត របស់ស្ថានីយ៍ប្រេងឥន្ធន:កាល់តិច បូកគោ កាលពីវេលាម៉ោង៨ និង៥០នាទី ព្រឹកថ្ងៃទី១០ ខែកក្កដា ឆ្នាំ២០១៦៕

photo_2016-09-16_16-47-08

មតិយោបល់