អាមេរិកៈ លោក Jeff Sessions អគ្គរដ្ឋអាជ្ញាអាមេរិក ត្រូវបានសភាគណបក្សប្រជាធិបតេយ្យ ទាមទារឲ្យដកខ្លួនចេញពីការស៊ើបអង្កេត ជុំវិញករណីជ្រៀតជ្រែករបស់រុស្ស៊ី ក្នុងការបោះឆ្នោតប្រធានាធិបតីអាមេរិក ឬក៏លាលែងចេញពីតំណែងតែម្ដង បន្ទាប់ពីគេបានដឹងថា លោក បានជួបជាមួយឯកអគ្គរដ្ឋទូតរុស្ស៊ី អំទ្បុងពេលយុទ្ធនាការសេតវិមាន កាលពីឆ្នាំទៅ។ នេះបើយោងតាមរយៈ សារព័ត៌មាន BBC ចេញផ្សាយនៅថ្ងៃទី៣ ខែមីនា ឆ្នាំ២០១៧។
លោក Sessions បានត្រូវសួរនៅក្នុងសវនាការឲ្យផ្តល់ចម្លើយ ពាក់ព័ន្ធនឹងការតែងតាំង កាលពីខែមករាថាតើលោកនឹងធ្វើបែបណាប្រសិនបើមានភស្តុតាងថាមាននរណាម្នាក់ បានធ្វើយុទ្ធនាការឃោសនាបោះឆ្នោតឲ្យលោក ត្រាំ ដោយជាប់ទាក់ទងជាមួយពួករុស្ស៊ីនោះ ប៉ុន្តែលោក បានដិសេធ និងធ្វើការអះអាងថា នៅអំទ្បុងខែនោះ លោកពិតជាគ្មានទំនាក់ទំនងជាមួយរុស្ស៊ីទ្បើយ។
លោក Sessions បានជួបជាមួយឯកអគ្គរដ្ឋទូតរុស្ស៊ី Sergei Kislyak កាលពីខែកក្កដា នៅក្នុងពិធីមួយ ស្ថិតនៅខាងក្រៅមហាសន្និបាតជាតិរបស់គណបក្សសាធារណរដ្ឋ និងបានជួបគ្នាម្ដងទៀត កាលពីខែកញ្ញា នៅការិយាល័យលោក ក្នុងវិមានសភាសអាមេរិក។
គួរបញ្ជាក់ដែរថា អ្នកនាំពាក្យនៃក្រសួងយុត្តិធម៌ អ្នកស្រី Sarah Isgur Flores បាននិយាយថា «គ្មានអ្វីនាំឲ្យយយល់ខុសលើលោក Sessions ជាដាច់ខាត» ព្រោះពួកទាំងពីរ បានជួបគ្នា មិនមែនអំពីជំនួបដែលលោកមានក្នុងឋានៈលោកជាសមាជិកព្រឹទ្ធសភាទេ៕
មតិយោបល់