ព័ត៌មានជាតិ

កងទ័ពដើរតួនាទីយ៉ាងសំខាន់ ក្នុងការចូលរួមអភិរក្សក្បាច់គុណបុរាណខ្មែរ

ភ្នំពេញ: ដើម្បីជួយអភិរ័ក្ស អភិវឌ្ឍន៍ និងលើកតម្កើងក្បាច់គុណបុរាណខ្មែរ កងយោធពលខេមរភូមិន្ទ បានដើរតួនាទីយ៉ាងសំខាន់បំផុតក្នុងការចូលរួមអភិរក្សក្បាច់គុណបុរាណខ្មែរ ឲ្យបាននៅស្ថិតស្ថេរគង់វង្ស។ នេះជាការលើកឡើងរបស់លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរ:ភូមិន្ទ នៅក្នុងពិធីចុះអនុស្សរណ:នៃការយោគយល់ ស្ដីពីកិច្ចសហការរៀបចំចងក្រង និងបណ្ដុះបណ្ដាលក្បាច់គុណកងយោធពលខេមរ:ភូមិន្ទ នៅគណ:កម្មាធិការជាតិអូឡាំពិកកម្ពុជា នារសៀលថ្ងៃទី២២ ខែមិថុនា ឆ្នាំ២០១៦នេះ។

ឧត្តមសេនីយ៍ឯក ហ៊ុន ម៉ាណែត បានលើកឡើងថា ការរៀបចំចងក្រងនូវក្បាច់គុណកងយោធពលខេមរ:ភូមិន្ទ ដែលយកពីធាតុផ្សំនៃក្បាច់គុណបុរាណខ្មែរ ទាំងបី រួមមានក្បាច់គុណល្បុក្កតោ យុទ្ធគុណខម និងក្បាច់ប្រដាល់សេរី ដាក់បញ្ជូលទៅក្នុងការហ្វឹកហ្វឺនរបស់កងទ័ពនោះ គឺដើម្បីអភិរ័ក្ស អភិវឌ្ឍន៍ និងលើកតម្កើងតម្លៃនៃក្បាច់គុណខ្មែរ។ លោកបន្ថែមថា ការគាំទ្រ ការប្រើប្រាស់ និងការហ្វឹកហ្វឺននូវក្បាច់គុណទាំងបីនេះ នឹងកាត់តែធ្វើឲ្យទូលំទូលាយឡើងថែមទៀត នៅក្នុងជួរមហាជន ជាពិសេស គឺកងយោធពខេមរ:ភូមិន្ទតែម្ដង ដែលបានដើរតួរនាទីយ៉ាងសំខាន់ក្នុងការចូលរួមអភិរក្សក្បាច់គុណបុរាណខ្មែរ។

លោក វ៉ាត់ ចម្រើន អគ្គលេខាធិការនៃគណ:កម្មាធិការជាតិអូឡាំពិកកម្ពុជា បានឲ្យដឹងថា ការហាត់ក្បាច់គុណបុរាណខ្មែរ មិនមែនជាការហ្វឹកហាត់រៀនសូត្រដើម្បីយកធ្វើជាអាជីពទេ ប៉ុន្តែក្បាច់គុណជាកីឡាមួយប្រភេទ ឬហៅថា សិល្ប:យុទ្ធគុណ ដែលបង្កើតឲ្យបានទាំងសុខភាពល្អ និងសាមគ្គីភាពក្នុងសង្គម។

ទោះយ៉ាងណា លោកអគ្គលេខាធិការរូបនេះថា ក្រោយការដាក់បញ្ចូលក្បាច់គុណល្បុក្កតោ និងយុទ្ធគុណខម ទៅក្នុងក្របខ័ណ្ឌកងទ័ព និងក្នុងកម្មវិធីអប់រំកាយ និងកីឡាផ្លូវការ របស់ក្រសួងអប់រំ យុវជន និងកីឡានោះ គ្រូហ្វឹកហាត់នៃក្បាច់គុណបុរាណខ្មែរទាំងពីរ ក៏នឹងក្លាយជាគ្រូក្របខ័ណ្ឌពេញសិទ្ធិរបស់ក្រសួងទាំងពីរ ដែលក៏ធ្វើឲ្យពួកគាត់មានអាជីពមួយអាចរកកម្រៃខ្លះសម្រាប់ផ្គត់ផ្គង់ជីវភាពគ្រួសាររបស់ពួកគេផងដែរ៕

មតិយោបល់