Post News Media ព័ត៌មានជាតិ គីមីទៀតហើយ! ស...

គីមីទៀតហើយ! សមត្ថកិច្ចរកឃើញ នំស្នូលសណ្តែកបន្ទះ មានផ្ទុកសារធាតុគីមីហាមឃាត់​ នៅច្រកទ្វារកំពង់ស្ពាន​ក្រុងបាវិត​

ស្វាយរៀង: យោងតាមផេកអគ្គនាយកដ្ឋានកាំកុងត្រូល បានឲ្យដឹងថា មន្ត្រីសាខាកាំកុងត្រូលខេត្តស្វាយរៀង ដោយមានការចូលរួមពី កងវរ:សេនាតូចលេខ ២ បានបន្តត្រួតពិនិត្យទំនិញនាំចូល សាច់ បន្លែ ផ្លែឈើ និងផលិតផលទំនិញផ្សេងៗទៀត តាមច្រកកំពង់ស្ពាន ក្រុងបាវិត ខេត្តស្វាយរៀង។

ក្នុងសកម្មភាពនោះដែរមន្ត្រីជំនាញបានដកយកគំរូ សាច់ បន្លែ ផ្លែឈើ និងផលិតផលទំនិញផ្សេងៗ ចំនួន ២៨ គំរូ មកធ្វើតេស្តបឋម ដើម្បីរកសារធាតុគីមីហាមឃាត់ដែលអាចធ្វើឲ្យប៉ះពាល់ដល់សុខភាពប្រជាពលរដ្ឋ។

​ជាលទ្ធផលមន្ត្រីជំនាញ បានរកឃើញសារធាតុគីមីហាមឃាត់ បូរ៉ាក់ (Borax) នៅក្នុងគំរូ នំស្នូលសណ្តែកបន្ទះ ប្រមាណ​៣​គីឡូក្រាម ហើយមន្ត្រីជំនាញបានធ្វើការដកហូត និងយកមកកម្ទេចចោលភ្លាមៗផងដែរ។

បន្ទាប់មកមន្ត្រីជំនាញ ក៏បានពន្យល់ណែនាំដល់អាជីវករទាំងអស់ឲ្យប្រយ័ត្ន ចំពោះការនាំទំនិញមកលក់ត្រូវសួររកប្រភពច្បាស់លាស់ ជៀសវាងពេលមានហានិភ័យកើតឡើងដល់សុខភាពរបស់អ្នកទទួលទាន៕