ចិន: យោងតាមគណ:កម្មការសុខាភិបាល របស់ប្រទេសចិន នៅថ្ងៃអង្គារនេះ បានឲ្យដឹងថា ចំនួនអ្នកស្លាប់ ដោយសារវីរុសឆ្លងកូរ៉ូណា ឬ COVID-19 បានកើនឡើងដល់យ៉ាងហោចណាស់ ១,៨៦៨ នាក់ហើយ បើគិតត្រឹមរយ:ពេញមួយថ្ងៃច័ន្ទ ដោយមានអ្នកស្លាប់ថ្មីបន្ថែមទៀត ចំនួន ៩៣ នាក់ មកពីខេត្តហ៊ូប៉ី និង ៥ នាក់ទៀត នៅតំបន់ផ្សេងទៀត ក្នុងប្រទេស។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី១៨ ខែកុម្ភ: ឆ្នាំ២០២០។

យ៉ាងណាមិញខាងរដ្ឋាភិបាល ក៏បានរាយការណ៍បញ្ជាក់ផងដែរថា រហូតមកទល់ពេលនេះ មានករណីឆ្លងថ្មីបន្ថែមទៀតចំនួន ១,៨៨៦ នាក់ នៅទូទាំងប្រទេស ប៉ុន្តែភាគច្រើនមកពីខេត្តហ៊ូប៉ី ដែលសរុបតួលេខអ្នកឆ្លងនៅទូទាំងប្រទេស គឺមានយ៉ាងហោចណាស់ចំនួន ៧២,៤៣៦ នាក់។

ព័ត៌មានចុងក្រោយនេះ កើតឡើងនៅពេលដែលអង្គភាពព័ត៌មានហិរញ្ញវត្ថុ Caixin ដែលមានមូលដ្ឋាន នៅទីក្រុងប៉េកាំង បានរាយការណ៍កាលពីថ្ងៃអង្គារថា បុគ្គលិកសុខាភិបាលចិនជាង ៣,០០០ នាក់ បានឆ្លងវីរុសនេះរួចទៅហើយ គឺវាមានចំនួនច្រើនជាង រហូតស្ទើរតែពីរដងនៃរបាយការណ៍ ដែលរដ្ឋាភិបាលបានចេញផ្សាយ៕