ភ្នំពេញ: តាមសេចក្ដីរាយការណ៍ព័ត៌មានបឋម នៅវេលាម៉ោង ៨ ​យប់ថ្ងៃទី១៧ ខែមីនា​ ឆ្នាំ២០២០ កម្លាំងសមត្ថកិច្ចខណ្ឌដង្កោ បានចុះណែនាំឲ្យម្ចាស់ហាង KTV ក្លឹបកម្សាន្តនានា ឲ្យផ្អាកជាបណ្ដោះអាសន្ន បន្ទាប់ពីមានការជូនដំណឹង របស់ក្រសួងសុខាភិបាល ស្ដីពីការទប់ស្កាត់ការរាតត្បាតនៃជំងឺឆ្លងកូវីដ ១៩ នាពេលបច្ចុប្បន្ន។

ខណ:ដែលកម្លាំង បានចុះអនុវត្តនៅទីតាំងមួយកន្លែង ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ ស្រាប់តែម្ចាស់ហាង ប្រាប់ថា កន្លែងគាត់ គ្រាន់តែជា «បៀហ្កាឌិន» ទេ ប៉ុន្តែសង្កេតឃើញមានមនុស្សម្នា ចូលហូប និងផឹកស៊ីជុំគ្នា ដូចថ្ងៃធម្មតាអ៊ីចឹង។

ពលរដ្ឋមានចម្ងល់ថា សេចក្ដីជូនដំណឹងរបស់ក្រសួង ប្រកាសឲ្យផ្អាកមានកន្លែងដូច KTV រោងកុន សារមន្ទីរ ការប្រគុំតន្ត្រីតាមទីសាធារណ: ក្លឹបកម្សាន្តនានាប៉ុណ្ណោះ ប៉ុន្តែ «បៀហ្កាឌិន» មិនដឹងថា ត្រូវបិទដែរឬទេ? ព្រោះវាក៏ជាទីប្រជុំជនផងដែរ ខណ:ខណ្ឌដង្កោ គេសង្កេតឃើញថា សម្បូរហាង «បៀហ្កាឌិន» គួរសម ជាពិសេសផ្លូវទៅទួលពង្រ យប់មិញនៅបើកធម្មតា ទោះអាជ្ញាធរមូលដ្ឋាន ចុះណែនាំយ៉ាងណាក៏មិនស្ដាប់ អាងមានហេតុផលថា «បៀហ្កាឌិន» ទេ៕