ភ្នំពេញៈ រថយន្ដម៉ាកអ៊ីស៊ុយស៊ុយពណ៌ស្លែមួយគ្រឿងបានទទួលរងការខូចខាតយ៉ាងដំណំ ខណៈពេលបើកបោះពួយយ៉ាងលឿនទៅបុករបាំងថ្មពុះចែកទ្រូងផ្លូវ បណ្តាលឲ្យរថយន្តទើលើរបាំងទៅមុខលែងរួច និងបាក់របាំងថ្ម២កង់ផងដែរ។

ហេតុការណ៍គ្រោះថ្នាក់ចរាចរខាងលើបានកើតមានឡើងកាលពី ម៉ោងប្រហែល៩យប់ថ្ងៃទី១២ សីហា ២០១៦ ចំណុចមុខសាកលវិទ្យាល័យភូមិន្ទភ្នំពេញ ផ្លូវ១១០ ក្រុម៦២ ភូមិ១៦ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

រថយន្ដបង្កម៉ាកអ៊ីស៊ុយស៊ុយពណ៌ស្លែពាក់ស្លាកលេខ ខេមរភូមិន្ទ០៩.២:៩០៧៨ បានទទួលរងការខូចខាតយ៉ាងដំណំ។

មន្ត្រីប៉ូលិសចរាចរខណ្ឌទួលគោកបានឲ្យដឹងថា នៅមុនពេលកើតហេតុគេបានឃើញរថយន្តបង្ក ម៉ាកអ៊ីស៊ុយស៊ុយពណ៌ស្លែ១គ្រឿងនេះបើកបរដោយបុរសម្នាក់ទំនងជាស្រវឹង បានបើកបររថយន្តតាមបណ្តោយផ្លូវសហព័ន្ធរុស្ស៊ីក្នុងទិសដៅពីកើតមកលិច លុះបើកបរមកដល់ចំណុចកើតហេតុ ក៏បានរេចង្កូតទៅបុករបាំងថ្មនេះយ៉ាងពេញទំហឹងតែម្តង បណ្តាលរបាំងថ្មបានបាក់អស់២កង់ ហើយរថយន្តបង្កក៏បានទទួលរងការខូចខាតផងដែរ។ ប៉ុន្តែសំណាងល្អមិនបានធ្វើឲ្យអ្នកបើកបររងរបួសធ្ងន់ធ្ងរនោះទេ។

ក្រោយពេលកើតហេតុរថយន្តបង្ក ត្រូវបានប៉ូលិសខណ្ឌទួលគោកប្រគល់ឲ្យការិយាល័យចរាចរណ៍ជើងគោករាជធានីភ្នំពេញ ដើម្បីដោះស្រាយទៅតាមច្បាប់៕