គ្រប់គ្នាបានដឹងហើយថា ក្រុមហ៊ុន Google បានទិញក្រុមហ៊ុន Motorola Mobility កាលពីឆ្នាំ ២០១១ ក្នុងតម្លៃ ១២,៥ពាន់លានដុល្លារអាមេរិក ហើយមកដល់ពេលនេះ Motorola Mobility នៅតែមានស្ថានភាពដូចមុន ពោលគឺដូចកាលដែលមិនទាន់ Google។
នៅពេលដែលគេនិយាយដល់រឿងនេះ គេក៏ចាប់អារម្មណ៍ដល់ Nokia ភ្លាម ព្រោះថា ថ្មីៗនេះ ក្រុមហ៊ុន Nokia បានលក់ឧបករណ៍ និងសេវាកម្មស្មាតហ្វូនរបស់ខ្លួនឲ្យទៅក្រុមហ៊ុន Microsoft មានន័យថា ស្មើនឹង Nokia លក់ក្រុមហ៊ុនឲ្យទៅ Microsoft។ អ្វីដែលគេចាប់អារម្មណ៍នោះគឺថា តើ Nokia អាចមានវេសនាដូច Motorola ដែរឬទេ? បើ Moto X ស្មាតហ្វូនថ្មីដំបូងរបស់ Google និង Motorola មិនទទួលបានការចាប់អារម្មណ៍ផងនោះ?
ក្រុមអ្នកវិភាគឯករាជបានលើកឡើងថា វេសនា Nokia មិនអាចដូច Motorola នោះទេ ព្រោះថា បច្ចុប្បន្នស្មាតហ្វូន Lumia និង Asha កំពុងតែបង្កើតប្រជាប្រិយភាពឲ្យ Nokia បើទោះបីជា Nokia លក់ឧបរណ៍ទៅឲ្យ Microsoft ក្ដី ប៉ុន្តែ Microsoft មិនបានបោះបង់វាចោលនោះទេគឺមានតែពង្រីកទីផ្សារ និងការផ្សព្វផ្សាយបន្ថែម ព្រោះថា Lumia ជាអ្នកធ្វើឲ្យ Windows Phone របស់ Microsoft មានទីផ្សារ។
ក្រុមហ៊ុន Nokia នឹង Microsoft បានសហការគ្នាយ៉ាងល្អក្នុងការប្រតិបត្តិលើស្មាតហ្វូន Lumia ប្រើ Windows Phone ដូច្នេះនៅពេលដែល Microsoft ទិញយកឧបករណ៍មួយនេះ ការប្រតិបត្តិនឹងកាន់តែប្រសើរជាងមុនទៅទៀត ព្រោះថា អ្នកប្រតិបត្តិមានតែម្នាក់ ហើយការសម្រេចចិត្តក៏មានតែម្នាក់ដែរ។
គួរបញ្ជាក់ផងដែរថា ការទិញលក់ឧបករណ៍ និងសេវាកម្មនេះ ក៏ជះឥទ្ធិពលដល់ក្រុមហ៊ុន Nokia ផងដែរ ពោលគឺធ្វើឲ្យ Nokia បាត់មុខនៅលើទីផ្សារស្មាតហ្វូន ម្យ៉ាងទៀត Nokia បានបាត់បង់មនុស្សសំខាន់មួយរូបគឺលោក Stephen Elop ដែលជានាយកប្រតិបត្តិ ក៏ត្រូវវិលត្រឡប់ទៅកាន់ Microsoft ដែលជាទីជម្រកចាស់វិញផងដែរ៕
មតិយោបល់