បច្ចុប្បន្នសេវាកម្ម Storage បានកើតឡើងជាច្រើនប៉ុន្តែក្រុមហ៊ុនដែលល្បីឈ្មោះមានតែប៉ុន្មាននោះទេ ដូចជា Google Drive, iCloud និង Dropbox ជាដើម។
លោក Drew Houston នាយកប្រតិបត្តិក្រុមហ៊ុន Dropbox បាននិយាយថា លោក Steve Jobs ស្ថាបនិក និងជាអតីតនាយកប្រតិបត្តិ Apple ចង់សម្លាប់លោក។ លោក Houston បានថ្លែងនៅក្នុងកិច្ចសម្ភាសន៍មួយថា លោកត្រូវបានលោក Jobs សុំជួបជាច្រើនដងដើម្បីពិភាក្សារឿងមុខជំនួញ ដោយនៅពេលនេះ មានមហាជនជាច្រើនងឿងឆ្ងល់ថា តើលោក Jobs ចង់ធ្វើអ្វីជាមួយនឹងលោកក្នុងគោលបំណងអ្វី?
ក្រោយពីជួបពិភាក្សាគ្នាមក គេសង្កេតឃើញថា អ្នកទាំងពីរហាក់ដូចជាមិនសប្បាយចិត្ត និងរីករាយដាក់គ្នាសោះ មានន័យថា ការពិភាក្សាត្រូវបរាជ័យ។
ចម្ងល់ទាំងឡាយត្រូវបានលាតត្រដាងនៅពេលនេះ ដោយលោក Houston បាននិយាយថា លោកចង់ទិញ Dropbox ប៉ុន្តែត្រូវបានបរាជ័យ ហើយលោក Steve Jobs បានបន្ថែមថា បើសិនជាមិនលក់នោះទេ Apple នឹងសម្លាប់ Dropbox ដោយវិធីសាស្ត្រផ្សេង ដោយជាលទ្ធផល Apple បានបង្កើត iCloud មួយឡើង។
នាយកប្រតិបត្តិ Dropbox បានបន្ថែមទៀតថា បើទោះបីជា Apple ចេញ iCloud ក្ដី ក៏អតិថិជនរបស់ខ្លួនមិនងាយទៅប្រើវាហើយបោះបង់ Dropbox ឡើយ៕
ព័ត៌មានជាតិ
មតិយោបល់