ចិន៖ នៅថ្ងៃអង្គារ ទី២១ ខែឧសភា ឆ្នាំ២០១៤ ប្រទេសចិន និងរុស្ស៊ី បានសន្យាបង្កើនកិច្ចសហប្រតិបត្តិការទ្វេភាគីឲ្យបានទូលំទូលាយជាងមុន ទៅលើវិស័យហិរញ្ញវត្ថុ ពាណិជ្ជកម្ម ថាមពល និងហេដ្ឋារចនាសម្ព័ន្ធដឹកជញ្ជូន។នេះបើយោងតាមការចុះផ្សាយរបស់ ទីភ្នាក់ងារព័ត៌មានចិន ស៊ិនហួ។
កិច្ចសន្យានេះ បានធ្វើឡើងក្រោយសេចក្តីថ្លែងការណ៍រួមគ្នា អំឡុងពេលទស្សនកិច្ចរបស់លោកប្រធានាធិបតីរុស្ស៊ី វ្លាឌីមៀ ពូទីន មកប្រទេសចិន ដើម្បីចូលរួមកិច្ចប្រជុំកំពូលលើកទី៤ នៃសន្និសីទអន្តរកម្ម និងវិធានការកសាងទំនុកចិត្ត នៅអាស៊ី នៅទីក្រុង សៀងហៃ ប្រទេសចិន ហើយទស្សនកិច្ចរបស់លោក ពូទីន ក៏ជាទស្សនកិច្ចតបតាម ការអញ្ជើញរបស់លោក ស៊ី ជិនពីង ប្រធានាធិបតីចិន ផងដែរ។
ប្រទេសទាំងពីរ បានប្តេជ្ញាថានឹងបង្កើន ពាណិជ្ជកម្មទ្វេភាគីឲ្យដល់ ១០០ពាន់លានដុល្លារអាម៉េរិក នៅឆ្នាំ២០១៥ និង២០០ពាន់លានដុល្លារអាម៉េរិក នៅឆ្នាំ២០២០ ខណៈទំហំពាណិជ្ជកម្មនៃប្រទេសទាំងពីរ កាលពីឆ្នាំមុន គឺមានត្រឹមតែជិត ៩០ពាន់លានដុល្លារអាម៉េរិកតែប៉ុណ្ណោះ។
ចិន និងរុស្ស៊ី ក៏បានប្តេជ្ញាបង្កើនកិច្ចសហប្រតិបត្តិការឲ្យបានស៊ីជម្រៅលើផ្នែកឧស្សាហកម្មប្រេង ដែលចាប់ផ្តើមផ្គត់ផ្គង់ឧស្ម័នធម្មជាតិទៅឲ្យចិន ក្នុងរយៈពេលឆាប់ៗតាមដែលអាចធ្វើទៅបាន និងការអភិវឌ្ឍន៍រួមគ្នានៃរ៉ែធ្យូងថ្មនៅរុស្ស៊ី ហើយប្រទេសទាំងពីរ ក៏នឹងពិចារណាលើការកសាងរោងចក្រថាមពលរួមគ្នា នៅក្នុងប្រទេសរុស្ស៊ី ដើម្បីបង្កើនការផ្គត់ផ្គង់ថាមពលទៅឲ្យចិន៕
មតិយោបល់