បច្ចុប្បន្នចំនួនអ្នកប្រើប្រាស់បណ្ដាញសង្គម Facebook បានកើនឡើងដល់ជាង ១ពាន់លាននាក់ ហើយកាលពីថ្មីៗនេះ ក្រុមហ៊ុន Facebook បានទិញយកកម្មវិធី WhatsApp ក្នុងតម្លៃ ១៩ពាន់លានបន្ថែមទៀត ដើម្បីពង្រីកវិសាលភាពតាមប្រព័ន្ធអនឡាញ។
បើទោះបីជាបណ្ដាញសង្គមមួយនេះកំពុងតែមានប្រជាប្រិយភាពក្ដី ប៉ុន្តែនៅតាមបណ្ដាប្រទេសមួយចំនួនបានធ្វើការរឹតបន្ដឹង និងមិនអនុញ្ញាតឲ្យលេង ដោយមានដូចជា ស៊ីរី ចិន និងអ៊ីរ៉ង់ជាដើម។
ខាងក្រោមនេះគឺជាបណ្ដាប្រទេសមួយចំនួនដែលធ្លាប់រឹតបន្ដឹង និងបិទមិនឲ្យលេង Facebook៖
១.អូស្ដ្រាលី៖ ចំនួនអ្នកប្រើ Facebook បច្ចុប្បន្ននៅក្នុងប្រទេសដែលនាំចេញសាច់គោច្រើនជាងគេមួយនេះ ធ្លាប់បានធ្វើការរឹតបន្តឹងទៅលើការប្រើ Facebook ក្នុងប្រទេស ដោយសារតែ Facebook បានអនុញ្ញាតឲ្យក្មេងដែលមានអាយុយ៉ាងតិច ១៣ឆ្នាំ អាចបង្កើតគណនី Facebook បាន កាលពីឆ្នាំ ២០១១ ក្រោយមកត្រូវបានរដ្ឋាភិបាលបង្គាប់ឲ្យកំណត់ដល់ ១៨ឆ្នាំវិញ។
២.ប្រទេសបង់ក្លាដែស៖ ដោយសារតែមានការបង្ហោះនូវពាក្យមិនសមរម្យ ជេរប្រមាថ ទើបរដ្ឋាភិបាលនៃប្រទេសនេះ បានបង្កើតនូវគណកម្មាការត្រួតពិនិត្យទៅលើបណ្ដាញសង្គម ជាពិសេស Facebook ដើម្បីការពារស្ថេរភាពសង្គម ព្រោះថាបានជេរប្រមាថនេះ បានធ្វើឲ្យមនុស្សជាច្រើនបានស្លាប់ ដោយការស្លាប់នោះត្រូវបានគេចាត់ទុកថាជាឧក្រិដ្ឋកម្ម។
៣.ប្រទេសចិន៖ រដ្ឋាភិបាលចិន ពុំអនុញ្ញាតឲ្យប្រើប្រាស់ Facebook នោះទេ ព្រោះរដ្ឋាភិបាលបានជឿថាបណ្ដាលមួយនេះ មិនមានសុវត្ថិភាពដល់ខ្លួន និងមួយវិញគឺចង់ឲ្យប្រជាជនចិនប្រើប្រាស់នូវផលិតផលផ្ទាល់ខ្លួន។ មិនមែនមានតែ Facebook ប៉ុណ្ណោះទេដែលចិនបានបិទនោះ សូម្បីតែសេវាកម្មមួយចំនួនរបស់ Google ក៏ត្រូវបានរារាំងផងដែរ។
៤.ប្រទេសអេហ្ស៊ីប៖ បណ្ដាញសង្គមមួយនេះត្រូវបានបិទប៉ុន្មានថ្ងៃបន្ទាប់ពីមានការផ្ទុះការតវ៉ាមួយឡើងកាលពីឆ្នាំ ២០១១។
៥. ប្រទេសអ៊ីរ៉ង់៖ ក្រោយពីការបោះឆ្នោតនាឆ្នាំ ២០០៩ បណ្ដាញ Facebook ត្រូវបានបិទ ហើយមកដល់ឆ្ឆាំ ២០១៣ បណ្ដាញ Twitter ត្រូវបានបិទមួយទៀត ដោយការបិទនេះគឺគ្មានហេតុផលនោះទេ។
៦. ប្រទេសស៊ីរី៖ រដ្ឋាភិបាលនៃប្រទេសនេះបានពន្យល់ថា ខ្លួនសម្រេចចិត្តបិទ Facebook ដោយសារតែមិនចង់ឲ្យមានការវាយប្រហារតាមរយៈអនឡាញ និងមិនចង់ឲ្យកើតមានបញ្ហាផ្សេងៗ ដូចនៅបណ្ដាលប្រទេសមួយចំនួន។
៧.ចក្រភពអង់គ្លេស៖ មានការរឿងរ៉ាវជាច្រើនបានកើតឡើងដោយសារតែ Facebook ហេតុនេះហើយទើបតម្រូវឲ្យមានការរឹតបន្តឹង ហើយអ្នកនាំពាក្យ Facebook ក៏បានថ្លែងឲ្យដឹងផងដែរថា ពួកខ្លួនបានយកចិត្តទុកដាក់លើការប្រើ Facebook នៅចក្រភពគ្លេស ដោយមិនឲ្យមានប៉ះពាល់ដល់ព្រះរាជវង្សឡើយ៕
មតិយោបល់