បន្ទាយមានជ័យ: បន្ទាប់ពីខេត្តបន្ទាយមានជ័យកាលពីឆ្នាំ២០០៧ត្រូវបានដកមេគយ មេប៉ូលីស. និងមន្ត្រីមួយចំនួនដែលជាប់ពាក់ព័ន្ធនាំរថយន្តចង្កូតស្តាំពីប្រទេសថៃតាមច្រករបៀងខេត្តបន្ទាយមានជ័យឥឡូវអង្គភាពប្រឆាំងអំពើពុករលួយធំក្លិនទៀតហើយបន្ទាប់ពីនៅតាមព្រំដែននៃខេត្តនេះមានការនាំចូលរថយន្តចង្កូតស្តាំនិងឆ្វេងគ្មានពន្ធចូលមកកម្ពុជាតែខ្លះត្រូវបានបង្ក្រាប។ដើម្បីគេចអោយផុតពីអង្គភាពប្រឆាំងអំពើពុករលួយ លោក គោស៊ុំ សារឿត អភិបាលខេត្តបន្ទាយមានជ័យអោយអ្នកជាប់ពាក់ព័ន្ធរឿងនេះត្រូវប្រយ័ត្ន។
ការលើកទ្បើងព្រមានដូចនេះរបស់អភិបាលគឺធ្វើកាលពីថ្ងៃទី២៨ វិច្ឆិកា ក្នុងកិច្ចប្រជុំគណ:បញ្ជាការឯកភាពខេត្ត ក្នុងនោះលោករំលឹក ហើយព្រមានរឿងឡានចង្កូតស្តាំ ដែលមានមន្ត្រីកងកម្លាំង និងឈ្មួញខ្មែរ ថៃ ឃុបឃិតគ្នារត់ពន្ធ នាំចូលល្មើសពីថៃ មកកម្ពុជាកន្លងមក “តាមដឹង នៅច្រករបៀងខាងជើងបឹងត្រកួន ពុំមែនមានតែម្ដងទេក្នុងការរត់ពន្ធនាំរថយន្តគឺច្រើនដង ហើយ មិនមានអ្នកណាក្រៅពីអ្នក នៅម្តុំនោះ ទេ តែសុំបញ្ឈប់ កុំបន្តទៀត។ “ចូរចងចាំថា ឡានចង្កូតស្តាំ ត្រូវប្រយ័ត្ន ព្រោះកន្លងមក ធ្លាប់ដកស្នងការរប៉ូលិស និង លោក ហីវ គឹមហេង មេគយ និងមន្ត្រីគយជាច្រើន”។ ក្នុងនោះលោកអភិបាល ខេត្តក៏បានព្រមានចំពោះការរត់ពន្ធម៉ូតូ ការនាំឈើគ្រញូង និងបញ្ហាគ្រឿងញៀនឆ្លងដែនផងដែរ។
គួររំលឹកថា កាលពីម៉ោង ៦ល្ងាចថ្ងៃទី២៧ កញ្ញា ២០១៤ នៅច្រករបៀងអូរសាយភូមិសាមគ្គី ឃុំគោករមៀត ស្រុកថ្មពួក ខេត្តបន្ទាយមានជ័យមាន ( ឈមនឹងភូមិ-ឃុំ-ស្រុកតាប្រាយ៉ា ខេត្តស្រះកែវ ប្រទេសថៃ) បុរសជនជាតិថៃម្នាក់ បានបើកបររថយន្តចង្កូតស្តាំម៉ាក តូយ៉ូតា វីហ្គោ ២ បាំង (ប្រភេទភីកអាប់) ១គ្រឿង ពណ៌ទឹកប្រាក់ ពាក់ស្លាកលេខ ក្រុងទេពមហានគរ (ក្រុងបាងកក) ឆម៥៥៥០។
ពេលនោះ មានឮគ្រាប់កាំភ្លើងប្រមាណ ១០ គ្រាប់របស់កម្លាំងតម្រួតថៃ បានបាញ់។ ដោយខ្លាចគ្រាប់កាំភ្លើង បុរសជនជាតិថៃ បន្តបើករថយន្តនោះ រត់ចូលជ្រៅ ដល់ក្នុងដីខ្មែរ ហើយទំនងជាវង្វេងផ្លូវផង ទើបមិនអាចផ្ទេរអោយជនជាតិខ្មែរឡើងបើកបរបន្ត យករថយន្ត ដូចសព្វមួយដង។
ក្រោយមានរឿងដូច្នេះ ទើបកម្លាំងប៉ូលិសព្រំដែន៨០៧ បានបញ្ជូនទៅរក្សាទុកនៅស្នងការដ្ឋាន ។ ហើយមុននឹចាប់រថយន្តខាងលើតាមច្រកព្រំដែនតំបន់តាប្រាយ៉ា-បឹងត្រកួន មានឈ្មួញប្រុង រត់ពន្ធនាំចួលរថយន្តទំនើប ៤ គ្រឿង គឺមានម៉ាកតូយ៉ូតាកាមរីបាឡែន ៣គ្រឿង និងរែងរ៉ូវើរ ១គ្រឿង ពីថៃមកកម្ពុជា។ ប៉ុន្តែបែកការណ៍ ក៏ត្រូវខាងសមត្ថកិច្ចថៃនៃមាត់ច្រកចូលកម្ពុជាបានឃាត់ចាប់។
សូមបញ្ជក់ថាដោយសារតែមានការនាំចូលរថយន្តចង្កូតស្តាំពីប្រទេសថៃដូចខាងលើទើបបច្ចុប្បន្ននៅខេត្តបន្ទាយមានជ័យឬខេត្តដែលជាប់ព្រំដែនពពេញទៅដោយរថយន្តចង្កូតស្តាំសេរីថ្មីៗ២០១៣-២០១៤ដោយគ្រាន់តែបំពាក់ស្លាក់លេខ ខេមរះភូមិន្ទនិងនគរបាលព្រោងព្រាត់៕
មតិយោបល់