បន្ទាប់ពីក្រុងហ្វ័រហ្គូសុន និងក្រុងញូវយ៉ក នៅទីក្រុង PHOENIX រដ្ឋអារីហ្សូណាអាមេរិកជួបរឿងអាស្រូវដែរទាក់ទិនដល់អំពើហិង្សា របស់ប៉ូលិស ។
ប៉ូលិសក្រុង PHOENIX រាយការណ៍កាលពីថ្ងៃទី៥ ធ្នូថា បុរសស្បែកខ្មៅអាយុ៣៤ឆ្នាំម្នាក់សង្ស័យលក់គ្រឿងញៀន ត្រូវបានប៉ូលិសស្បែកសម្នាក់បាញ់ស្លាប់ ។
ការប្រកាសនោះធ្វើ ឡើង ខណៈមនុស្សជាច្រើនពាន់នាក់បានប្រមូលផ្តុំគ្នាធ្វើបាតុកម្មជាថ្មី ទៀតនាពេលយប់នៅក្រុងញូវយ៉ក និងក្នុងទីក្រុងអាមេរិកជាច្រើនទៀតដើម្បីតវ៉ាប្រឆាំងនឹងការ សម្រេចរបស់គណៈក្រុមប្រឹក្សាតុលាការ២ មិនធ្វើការចោទប្រកាន់ប្រឆាំងប៉ូលិសជាអ្នកទទួលខុសត្រូវចំពោះការ ស្លាប់របស់បុរសស្បែកខ្មៅ យុវជន MICHAEL BROWN នៅទីក្រុងហ្វ័រហ្គូសុន រដ្ឋមីស៊ូរី និងលោក ERIC GARNER មានកូន៦នាក់នៅក្រុងញូវយ៉ក ។
ដូចនៅទីក្រុងហ្វ័រហ្គូសុ ន និងក្រុងញូវយ៉កដែរ ជនរងគ្រោះនៅរដ្ឋអារីហ្សូណាពុំមានកាន់អាវុធដូចគ្នា ។ យោងតាមរបាយការណ៍របស់ប៉ូលិសថា បុរសឈ្មោះ RUMAIN BRISBON បានប៉ុនប៉ងគេចខ្លួន ហើយបដិសេធពុំព្រមធ្វើតាមបញ្ជាប៉ូលិសស្បែកស អាយុ៣០ឆ្នាំម្នាក់ ដែលពុំលាតត្រដាងឈ្មោះ តែគេមានបទពិសោធន៍៧ឆ្នាំមកហើយ ។ មានការប្រតាយគ្នារវាងអ្នកទាំង២ ពេលប៉ូលិសប៉ុនប៉ងចាប់ខ្លួនបុរសនោះ ។ ពេលលោក BRISON លូកដៃក្នុងហោប៉ៅ ប៉ូលិសបានចាប់ដៃគេ ហើយកុំឱ្យដកដៃចេញពីហោប៉ៅ ។ ដោយសង្ស័យក្នុងហោប៉ៅមានកាំភ្លើងខ្លីមួយដើម ប៉ូលិសក៏បានបាញ់២គ្រាប់លើលោក BRISON ។ ជននោះបានស្លាប់នៅនឹងកន្លែងក្រោយប៉ូលិសឯទៀតលើកគ្នាមកដល់ ។ តាមការពិត នៅក្នុងហោប៉ៅរបស់លោក BRISBON មានប្រអប់មួយដាក់ថ្នាំ OXYCODONE ដែលជារឿយៗត្រូវគេប្រើជាគ្រឿងញៀន ៕
មតិយោបល់