ក្រុមឧទ្ទាមរដ្ឋឥស្លាមផ្ដាច់ខ្លួន ISIS បានប្រកាសថា ចំណាប់ខ្មាំងស្ត្រីជនជាតិអាមេរិក នាង Kayla Mueller ត្រូវបានសម្លាប់នៅក្នុងការវាយប្រហារតាមដែនអាកាសរបស់ប្រទេសហ្ស៊កដានី កាលពីថ្មីៗ ដែលបានទម្លាក់គ្រាប់បែកទៅលើលំនៅដ្ឋានមួយកន្លែង ដែលជាកន្លែងលាក់ខ្លួនរបស់ ISIS ទីក្រុង Raqqa ប្រទេសស៊ីរី។
បើទោះបីជាយ៉ាងនេះក្ដី គេនៅមិនទាន់ច្បាស់ថា នោះជាការពិត ឬមួយយ៉ាងណានោះទេ ព្រោះអាចជាល្បិចរបស់ក្រុម ISIS ដើម្បីធ្វើឲ្យអាមេរិក ខឹងហ្ស៊កដានី។ ការវាយប្រហារតាមដែនអាកាសរបស់ហ្ស៊កដានី ទៅលើមូលដ្ឋាន ISIS នៅព្រំដែនស៊ីរី ត្រូវបានធ្វើឡើងក្រោយពេលដែលក្រុម ISIS បានដុតសម្លាប់ចំណាប់ខ្មាំងអ្នកបើកបរយន្តហោះរបស់ខ្លួន ទើបហ្ស៊កដានីកើតមានកំហឹង ហើយក៏បើកការវាយប្រហារតែម្ដង។
តើនាង Kayla Mueller ជានរណា? ហេតុអ្វីបានជានាងត្រូវបានក្រុម ISIS ចាប់ខ្លួន?
នាង Kayla Mueller បានធ្វើដំណើរទៅកាន់ព្រំដែនតួកកី-ស៊ីរី កាលពីឆ្នាំ ២០១២ ដើម្បីបំពេញការងារជាក្រុមប្រឹក្សាជនភៀសខ្លួនដាណឺម៉ាក និងគម្រោងគាំទ្រជីវិត និងជាជំនួយការដល់ជនភៀសខ្លួន នេះបើយោងតាមការបញ្ជាក់ពីក្រុមគ្រួសាររបស់នាង។
នៅថ្ងៃទៅ០៤ ខែសីហា ឆ្នាំ ២០១៣ នាង Kayla Mueller ត្រូវបានក្រុម IS ចាប់ជាចំណាប់ខ្មាំងនៅក្នុងតំបន់អាឡេប៉ូ ប្រទេសស៊ីរី ខណៈពេលដែលនាងបានចាកចេញពីមន្ទីរពេទ្យ ដែលគ្រប់គ្រងដោយអង្គការ MSF ។
នៅក្នុងអំឡុងពេលបំពេញការងារ នាងបានទៅដល់កន្លែងជំរុំជនភៀសខ្លួន និងជាកន្លែងដែលនាងបានជួបជាមួយក្មេងៗជាច្រើន ជាពិសេសគឺនាងបានឃើញអ្វីគ្រប់យ៉ាងដែលពុំធ្លាប់ឃើញពីមុនមក។ នាងបានប្រាប់ទៅកាន់ក្រុមគ្រួសារថា នាងមិនអាចជួយដល់ជនភៀសខ្លួនស៊ីរីបានគ្រប់គ្នានោះទេ ប៉ុន្តែនាងនឹងព្យាយាមធ្វើឲ្យអស់ពីសមត្ថភាពតាមតែអាចធ្វើទៅបាន។
យោងតាមការចុះផ្សាយរបស់កាសែត Daily Courier បានដកស្រង់សំដីនាង Mueller ថា “ពេលខ្ញុំទៅដល់ស៊ីរី ពួកគេបានសួរខ្ញុំថា ខ្ញុំជាជនជាតិអាមេរិកមែន? ហើយពួកគេបានសួរទៀតថា ពិភពលោកនៅឯណា? សំនួរនេះបានធ្វើឲ្យខ្ញុំយំ ហើយពួកគេក៏យំជាមួយខ្ញុំដែរ ព្រោះថាខ្ញុំមិនដឹងជាឆ្លើយប្រាប់ពួកគេថាម្ដេច”។
នាង Mueller បានបញ្ជាក់នៅក្នុងកាសែតដដែលថា នៅពេលនាងទៅដល់ជំរុំភៀសខ្លួន នាងបានឮក្បែងៗនិយាយថា ស្រីភាគច្រើនត្រូវរៀបការជាមួយកងកម្លាំងនៅមុនពេលពួកគេហៀបចេញទៅប្រយុទ្ធ។ នាងបានបញ្ជាក់ទៀតថា ជីវិតហាក់ដូចជាអយុត្តិធម៌ ព្រោះថាមានពេលខ្លះពួកគេរស់នៅដូចសត្វធាតុ។
នាង Mueller បានបញ្ចប់ការសិក្សានៅសកលវិទ្យាល័យ Northern Arizona University និងបានចូលបម្រើការងារស្ម័គ្រចិត្តផ្នែកជួយសង្គ្រោះ និងជំនួយអស់រយៈពេល ៣ឆ្នាំ។ បន្ទាប់ពីបានបញ្ចប់ការសិក្សានៅក្នុងឆ្នាំ ២០១១ នាងបានរស់នៅ និងបានធ្វើការជាមួយក្រុមជំនួយមនុស្សធម៌នៅភាគខាងជើងប្រទេសឥណ្ឌា អ៊ីស្រាអែល និងប៉ាឡេស្ទីន។ បន្ទាប់មក នាងបានត្រឡប់ទៅកាន់អារីហ្សូណាវិញ ដោយបម្រើការងារនៅក្នុងគ្លីនិក HIV/AIDS។ នៅចុងឆ្នាំ ២០១១ នាងបានទៅប្រទេសបារាំង និងបានរៀនភាសាបារាំងដើម្បីត្រៀមខ្លួនទៅធ្វើការនៅអាហ្រិក ប៉ុន្តែនៅឆ្នាំ ២០១២ នាងបានសម្រេចចិត្តទៅកាន់ស៊ីរី៕
មតិយោបល់