រដ្ឋបាលរបស់ប្រធានាធិបតីលោក Joe Biden កំពុងស្វះស្វែងបញ្ចុះបញ្ចូលអ៊ីរ៉ង់ឲ្យចូលរួមក្នុងកិច្ចចរចាអំពីការអនុវត្តតាមកិច្ចព្រមព្រៀងជាបន្តរវាងភាគីទាំងពីរ ក្រោមលក្ខខណ្ឌដែលការដាក់ទណ្ឌកម្មរបស់សហរដ្ឋអាមេរិក និងសេដ្ឋកិច្ចផ្សេងៗទៀតបានដកចេញពីទីក្រុងតេអេរ៉ង់ជាថ្នូរនឹងការទប់ស្កាត់កម្មវិធីនុយក្លេអ៊ែរអ៊ីរ៉ង់ដើម្បីធ្វើឲ្យកាន់តែពិបាកក្នុងការអភិវឌ្ឍអាវុធនុយក្លេអ៊ែរ តែក្រុងតេអេរ៉ង់បដិសេធមហិច្ឆិតានេះ។
អតីតប្រធានាធិបតីលោក Donald Trump បានដកខ្លួនចេញពីកិច្ចព្រមព្រៀងក្នុងឆ្នាំ ២០១៨ ហើយបានដាក់ទណ្ឌកម្មរបស់សហរដ្ឋអាមេរិកឡើងវិញដែលជាកត្តាជំរុញឲ្យអ៊ីរ៉ង់រំលោភលើការរឹតត្បិតនុយក្លេអ៊ែរមួយចំនួនដើម្បីសងសឹកបន្ទាប់ពីមានការរង់ចាំជាងមួយឆ្នាំ។
មន្ត្រីប្រទេសលោកខាងលិចបាននិយាយថាសហរដ្ឋអាមេរិក និងអ៊ីរ៉ង់មិនទាន់មានការយល់ព្រមអ្វីទេ សូម្បីតែការប្រជុំដើម្បីស្តារឡើងវិញនូវកិច្ចព្រមព្រៀងនេះក៏មិន មានដែរ ហើយពួកគេកំពុងទាក់ទងគ្នាដោយប្រយោលតាមរយ:បណ្តាប្រទេសអឺរ៉ុប។
សហភាពអឺរ៉ុបបាននិយាយថា “អ្នកចូលរួមប្រជុំនឹងពិភាក្សាពីចក្ខុវិស័យនៃលទ្ធភាពវិលត្រលប់របស់សហរដ្ឋអាមេរិកទៅរកផែនការ JCPOA (ផែនការសកម្មភាពរួមគ្រប់ជ្រុងជ្រោយ) និងពិភាក្សាពីមធ្យោបាយនានាដើម្បីធានានូវការអនុវត្តកិច្ចព្រមព្រៀងពេញលេញ និងប្រកបដោយប្រសិទ្ធភាពដោយភាគីទាំងអស់”។
ប្រភពការទូតប្រទេសពីរដែលមិនបញ្ចេញអត្តសញ្ញាណបាននិយាយថា អង់គ្លេស បារាំង និងអាល្លឺម៉ង់បានធ្វើកិច្ចចរចាជាមួយអ៊ីរ៉ង់រួចហើយកាលពីថ្ងៃចន្ទ ហើយប្រភពមួយបាននិយាយថាមានការពិភាក្សាអំពីសំណើរបស់អ៊ីរ៉ង់។
អ្នកនាំពាក្យក្រសួងការបរទេសបារាំងបានប្រាប់អ្នកយកព័ត៌មាននៅក្នុងសន្និសីទសារព័ត៌មានប្រចាំថ្ងៃមួយថា មហាអំណាចអឺរ៉ុបកំពុងធ្វើការយ៉ាងជិតស្និទ្ធជាមួយប្រទេសរុស្ស៊ី និងចិនដែលជាភាគីដែលនៅសេសសល់ក្នុងកិច្ចព្រមព្រៀងនេះដើម្បីស្វែងរកដំណោះស្រាយចំពោះភាពជាប់គាំងហើយបានជជែកជាមួយទីក្រុងតេអេរ៉ង់ និងទីក្រុងវ៉ាស៊ីនតោនផងដែរ ៕
មតិយោបល់