(ស៉ីដនី)៖ នាយករដ្ឋមន្រ្តីអូស្រ្តាលី លោក Scott Morrison នៅថ្ងៃពុធនេះបានស្នើទៅកាន់សហភាពអឺរ៉ុបឲ្យបញ្ចេញវ៉ាក់សាំងបង្ការជំងឺ COVID-19 របស់ក្រុមហ៊ុន AstraZeneca សរុបជាង៣លានដូស ដែលប្រទេសលោកបានបញ្ជាទិញ។ វ៉ាក់សាំងទាំងនេះដំបូងឡើយត្រូវមកដល់កាលពីចុងខែមីនា តែអូស្ត្រាលីអះអាងថាសហភាពអឺរ៉ុប បានរឹតត្បិតការនាំចេញ។

កម្មវិធីចាក់វ៉ាក់សាំងរបស់អូស្រ្តាលី បានចាប់ផ្តើមយឺតជាងបណ្ដាប្រទេសមួយចំនួន ដោយសារតែមានចំនួនករណីឆ្លងទាប ប៉ុន្តែការរាំងស្ទះនៃវ៉ាក់សាំង AstraZeneca កំពុងធ្វើប្រទេសនេះពិបាកក្នុងការបង្កើនល្បឿន នៃការចាក់វ៉ាក់សាំងនៅទូទាំងប្រទេស។

ប្រជាជនអូស្រ្តាលីតែប្រហែល ៦៧០,០០០នាក់ប៉ុណ្ណោះ ដែលទទួលបានការចាក់វ៉ាក់សាំងសម្រាប់ដូសដំបូង ដោយវាខុសពីគោលដៅដំបូងរបស់ប្រទេសអូស្រ្តាលី ដែលមានគោលបំណង ចាក់វ៉ាក់សាំងជូនប្រជាជនរបស់ខ្លួន ឲ្យបានចំនួន ៤លាននាក់នៅចុងខែមីនា។ ក៏ប៉ុន្តែ EU បានបដិសេធថា មិនបានរឹតត្បិតការនាំចេញវ៉ាក់សាំងមកអូស្រ្តាលីឡើយ៕

Reuters៖ ថ្ងៃទី០៧ ខែមេសា ឆ្នាំ២០២១