អ្នកចាំទីក្រុមតោខៀវ Chelsea, Kepa Arrizabalaga ត្រូវបានកោះហៅឲ្យចូលហ្វឹកហាត់ក្នុងក្រុមជំរើសជាតិអេស្ប៉ាញ ដែលនឹងអាចមានឈ្មោះលេងនៅ Euro ២០២០ ក្រោយប្រធានក្រុម Sergio Busquet ឆ្លង Covid-19។
អេស្ប៉ាញមិនបានប្រកួតមិត្តភាពចុងក្រោយរបស់ខ្លួនទល់នឹងលីទុយអានីឡើយ បន្ទាប់ពីប្រធានក្រុម Sergio Busquet ឆ្លង Covid-19 កាលពីថ្ងៃអាទិត្យពោលគឺ ៨ថ្ងៃប៉ុណ្ណោះមុនអេស្ប៉ាញចាប់ផ្តើមប្រកួតនៅ Euro ខណ:កីឡាករផ្សេងទៀតទោះតេស្តអវិជ្ជមានពិតមែន តែត្រូវហ្វឹកហាត់ដាច់ដោយឡែក។
Kepa រួមជាមួយកីឡាករ ៥នាក់ផ្សេងទៀតរួមមានកីឡាកររបស់ Valencia, Carlos Soler កីឡាកររបស់ Celta Vigo, Brais Mendez កីឡាករបស់ Villarreal, Raul Albiol កីឡាករ West Ham, Pablo Fornals និងកីឡាកររបស់ Leeds, Rodrigo Moreno ត្រូវបានកោះហៅឲ្យហ្វឹកហាត់រួមគ្នា តែមិនឡូកឡំជាមួយកីឡាករទាំង ២៣នាក់ផ្សេងទៀតឡើយ ខណ:ដែលកីឡាករទាំង ៦ អាចត្រូវបានកោះហៅ ប្រសិនមានកីឡាករផ្សេងទៀតតេស្តវិជ្ជមាន Covid-19។ ក្រុមអេស្ប៉ាញនឹងចាប់ផ្តើម Euro ២០២០ របស់ខ្លួនដោយនឹងត្រូវជួបជាមួយស៊ុយអែតនៅថ្ងៃទី១៤ សប្តាហ៍ក្រោយមុនបន្តជួបប៉ូឡូញថ្ងៃទី១៩ និងចុងក្រោយជួបស្លូវ៉ាគី៕
មតិយោបល់