ចំនួនជនរងគ្រោះបាត់បង់ជីវិត បង្កឡើងដោយគ្រោះមហន្តរាយទឹកជំនន់ ដែលវាយបោកបក់លើបណ្តាប្រទេសនៅអឺរ៉ុបមួយផ្នែក កាលពីយប់ថ្ងៃពុធទី ឆ្លងចូលថ្ងៃព្រហស្បតិ៍ទី១៥កក្កដា បានកើនឡើងកាន់តែច្រើន។ ប្រឈមនឹងគ្រោះមហន្តរាយមរណ:មិនធ្លាប់ប្រទះ លោកស្រីប្រធានគណ:កម្មការអឺរ៉ុប និងលោកស្រីប្រមុខរដ្ឋាភិបាលអាល្លឺម៉ង់ បានចុះសួរសុខទុក្ខប្រជាពលរដ្ឋរួចពីស្លាប់ និងរងគ្រោះ នៅថ្ងៃអាទិត្យទី ១៨កក្កដានេះ។
លោកស្រីមែរកិល មានគម្រោងចុះទៅជួបប្រជាពលរដ្ឋនៃភូមិ Schuld ដែលរលុបស្ទើរបាត់ពីផែនទី ដោយទឹកជំនន់និងការហូរបាក់ដី។ នេះជាគ្រោះមហន្តរាយធម្មជាតិដ៏ធ្ងន់ធ្ងរដែលអាល្លឺម៉ង់មិនធ្លាប់ប្រទះពីមុនមកទេ។ គ្រោះទឹកជំនន់ដ៏ធំខ្លាំងជាងគេកាលពី១០០ឆ្នាំមុនក៏មិនខ្លាំងដូចនេះដែរ។
ជាសរុបគិតត្រឹមព្រឹកថ្ងៃអាទិត្យ គ្រោះមហន្តរាយបានផ្តាច់ជីវិតមនុស្សអស់យ៉ាងហោចណាស់១៨៣នាក់ ក្នុងនោះ ២៧នាក់នៅប៊ែលហ្សិក និង១៥៦នាក់នៅប្រទេសអាល្លឺម៉ង់។ តុល្យការនៅអាល្លឺម៉ង់អាចនឹងកាន់តែធ្ងន់ធ្ងរបន្ថែមទៀត ព្រោះនៅមានអ្នកបាត់ខ្លួនជាច្រើនសិបនាក់ទៀត។ ខណ:នេះ ការសង្គ្រោះនិងការស្វែងរកជនបាត់ខ្លួនកំពុងបន្ត។
សូមបញ្ជាក់ថា នៅក្នុងចំណោមជនរងគ្រោះជាច្រើនសិបនាក់នៅអាល្លឺម៉ង់នោះ មានគ្រួសារខ្លះជាដើមកំណើតខ្មែរ។ គ្រួសារខ្មែរមួយ បានបាត់បង់កូនប្រុសអាយុ១៨ឆ្នាំ ដែលស្នាក់នៅមជ្ឈមណ្ឌលថែទាំក្មេង។ សាកសពយុវជននោះទើបត្រូវបានប៉ូលិសអាល្លឺម៉ង់រកឃើញនៅពីរថ្ងៃក្រោយគ្រោះទឹកជំនន់៕
មតិយោបល់