ប្រភពការទូតមួយបាននិយាយកាលពីថ្ងៃអាទិត្យថា អ្នកតំណាងពិសេសរបស់សហរដ្ឋអាមេរិកសម្រាប់កូរ៉េខាងជើង លោក Sung Kim ត្រូវបានគេរំពឹងថានឹងធ្វើទស្សនកិច្ចនៅទីក្រុងសេអ៊ូលនៅចុងខែនេះដើម្បីពិភាក្សាជាមួយសមភាគីកូរ៉េខាងត្បូង និងកិច្ចប្រជុំត្រីភាគីពាក់ព័ន្ធនឹងប្រេសិតនុយក្លេអ៊ែររបស់រុស្ស៊ី។

ប្រភពនោះបាននិយាយថា លោក Kim ត្រូវបានគេរំពឹងថានឹងមកដល់នៅថ្ងៃសៅរ៍សប្តាហ៍នេះសម្រាប់ដំណើរទស្សនកិច្ចរយ:ពេល ៤ថ្ងៃ។ វានឹងក្លាយជាដំណើរទស្សនកិច្ចលើកទីពីររបស់លោកទៅកាន់ប្រទេសកូរ៉េខាងត្បូងចាប់តាំងពីបានឡើងកាន់តំណែងជាប្រេសិតនុយក្លេអ៊ែររបស់ទីក្រុងវ៉ាស៊ីនតោន។ លោកបានទៅធ្វើទស្សនកិច្ចនៅទីក្រុងសេអ៊ូលចុងក្រោយកាលពីខែមិថុនា។

ខណ:ដែលលោក Kim ស្ថិតនៅក្នុងទីក្រុងនោះ ប្រសិតនុយក្លេអ៊ែររបស់រុស្ស៊ី លោក Igor Morgulov ក៏ត្រូវបានគេរំពឹងថានឹងធ្វើទស្សនកិច្ចនៅកូរ៉េខាងត្បូងសម្រាប់កិច្ចចរចាត្រីភាគីដែលអាចធ្វើទៅបានជាមួយសមភាគីកូរ៉េខាងត្បូងរបស់ពួកគេ គឺលោក Noh Kyu-duk ផងដែរ។

ដំណើរទស្សនកិច្ចដែលត្រូវបានរំពឹងទុករបស់លោក Kim និងលោក Morgulov នោះ បានកើតឡើងនៅពេលដែលប្រទេសកូរ៉េខាងជើងកំពុងបង្កើនសម្ពាធទៅលើកូរ៉េខាងត្បូង និងសហរដ្ឋអាមេរិកជុំវិញសមយុទ្ធរួមគ្នាប្រចាំឆ្នាំរបស់កូរ៉េខាងត្បូង និងសហរដ្ឋអាមេរិកដែលនឹងចាប់ផ្តើមនៅថ្ងៃច័ន្ទនេះសម្រាប់រយ:ពេល ៩ថ្ងៃ។

នៅពេលដែលប្រទេសកូរ៉េខាងត្បូង និងសហរដ្ឋអាមេរិកបានចាប់ផ្តើមធ្វើសមយុទ្ធបឋមកាលពីថ្ងៃអង្គារ លោកស្រី Kim Yo-jong ប្អូនស្រីរបស់មេដឹកនាំកូរ៉េខាងជើង លោក គីម ជុងអ៊ុន បានស្តីបន្ទោសទៅលើសមយុទ្ធមួយនេះថាជាទង្វើមិនចង់បំផ្លាញខ្លួនឯងដែលមានតម្លៃថ្លៃគួរសម ហើយកូរ៉េខាងជើងបានចាប់ផ្តើមបដិសេធមិនទទួលទូរស័ព្ទជាប្រចាំរបស់កូរ៉េខាងត្បូងតាមរយ:ខ្សែទូរស័ព្ទបន្ទាន់របស់ពួកគេនៅថ្ងៃនោះ៕