ដំណឹងនៃកិច្ចសន្ទនារវាងប្រធានាធិបតីបារាំងលោកម៉ាក្រុង និងនាយករដ្ឋមន្រ្តីឥណ្ឌាលោកម៉ូឌីត្រូវបានប្រកាសដោយវិមានប្រធានាធិបតីបារាំងអេលីហ្សេតាមរយ:សេចក្តីប្រកាសព័ត៌មានមួយ។ នៅក្នុងសេចក្តីប្រកាសព័ត៌មាន លោកម៉ាក្រុងបានរម្លឹកប្រាប់លោកម៉ូឌីពីការប្តេជ្ញាចិត្តរបស់បារាំងក្នុងការរួមចំណែកពង្រឹងស្វ័យភាពយុទ្ធសាស្ត្ររបស់ឥណ្ឌា ក្នុងនោះមានទាំងមូលដ្ឋានឧស្សាហកម្ម និងមូលដ្ឋានបច្ចេកវិទ្យា ហើយការរួមចំណែកនេះធ្វើឡើងនៅក្នុងក្របខ័ណ្ឌនៃទំនាក់ទំនងជិតស្និទ្ធដោយផ្អែកលើការជឿទុកចិត្ត និងការគោរពគ្នាទៅវិញទៅមករវាងដៃគូយុទ្ធសាស្ត្រទាំងពីរ។
សេចក្តីប្រកាសព័ត៌មានរបស់វិមានអេលីហ្សេដែលមិនបាននិយាយដៀមដាមលើវិបត្តិដែលបារាំងកំពុងមានជាមួយអាមេរិកបានបញ្ជាក់ថា ការរំកិលជិតគ្នារវាងក្រុងប៉ារីស និងក្រុងញូដែលីមានមហិច្ឆតាលើកកម្ពស់ស្ថិរភាពតំបន់ និងការគោរពច្បាប់អន្តរជាតិដោយបដិសេធនូវអនុត្តរភាពគ្រប់រូបភាពនៅក្នុងតំបន់ឥណ្ឌូប៉ាស៊ីហ្វិក។ កិច្ចសន្ទនារវាងលោកម៉ាក្រុង និងលោកម៉ូឌីបានធ្វើឡើង ចំពេលដែលបារាំងកំពុងក្តៅក្រហាយនឹងសម្ព័ន្ធមិត្តថ្មីរវាងអាមេរិក អូស្រា្តលី និងអង់គ្លេសសម្រាប់តំបន់ឥណ្ឌូប៉ាស៊ីហ្វិក។ តាមរយ:សម្ព័ន្ធមិត្តថ្មីមួយនេះ អូស្រា្តលីបានសម្រេចលុបចោលកុងត្រាទិញនាវាមុជទឹកបារាំងដោយងាកទៅទិញនាវាមុជទឹកអាមេរិកវិញ។
ក្រៅពីតំបន់ឥណ្ឌូប៉ាស៊ីហ្វិក លោកម៉ាក្រុង និងលោកម៉ូឌីក៏បានសម្តែងក្តីបារម្ភចំពោះស្ថានការណ៍នៅប្រទេសអាហ្វហ្កានីស្ថានដែលអំណាចកំពុងស្ថិតក្នុងដៃពួកតាលីបង់។ នៅក្នុងរឿងនេះ លោកម៉ាក្រុង និងលោកម៉ូឌីបានអំពាវនាវឲ្យពួកតាលីបង់បញ្ឈប់ទំនាក់ទំនងជាមួយអង្គការភេរវនិយមអន្តរជាតិ គោរពច្បាប់ជាមូលដ្ឋាន និងបើកទ្វារឲ្យអង្គការមនុស្សធម៌ចូលទៅធ្វើការដោយសេរីនៅទូទាំងប្រទេស។ ទាក់ទងនឹងទំនាក់ទំនងទ្វេភាគីលើគ្រប់វិស័យ ពិសេសវិស័យសេដ្ឋកិច្ចត្រូវបានលោកម៉ាក្រុង និងលោកម៉ូឌីប្តេជ្ញាពង្រឹងបន្ថែមទៀត។
គួរបញ្ជាក់ថាក្នុងរយ:ពេលប៉ុន្មានឆ្នាំចុងក្រោយនេះ បារាំងបានខិតចូលជិតឥណ្ឌាកាន់តែខ្លាំងតាមរយ:ការលក់យន្តហោះចម្បាំង Rafale ឲ្យឥណ្ឌា ការធ្វើប្រតិបត្តិការយោធារួមគ្នានៅមហាសមុទ្រឥណ្ឌា និងការដែលបារាំងបានទទួលទាហានជើងទឹកឥណ្ឌានៅមូលដ្ឋានទ័ពរបស់ខ្លួននៅជីប៊ូទី នៅអេមីរ៉ាតអារ៉ាប់រួម និងនៅរ៉េអុយញ៉ុង៕
មតិយោបល់