(Reuters) - កាលពីថ្ងៃអង្គារ៍ប្រធានាធិបតីហ្វីលីពីនលោក Rodrigo Duterte បាននិយាយថា ជនណាដែលត្រូវបានរកឃើញថា “បានធ្វើសកម្មភាពហួសពីព្រំដែន” ក្នុងយុទ្ធនាការប្រឆាំងគ្រឿងញៀនខុសច្បាប់របស់លោក ដែលនឹងត្រូវទទួលខុសត្រូវតាមច្បាប់ជាតិ ខណ:ដែលកំពុងបង្ហាញការបដិសេធចំពោះការស៊ើបអង្កេតរបស់តុលាការឧក្រិដ្ឋកម្មអន្តរជាតិ។
លោក Duterte បានប្រាប់មហាសន្និបាតអង្គការសហប្រជាជាតិថា លោកបានណែនាំដល់ក្រសួងយុត្តិធម៌ និងនគរបាលហ្វីលីពីនឱ្យពិនិត្យមើលឡើងវិញនូវដំណើរការយុទ្ធនាការនេះ ដែលពេលនោះមានជនសង្ស័យជួញដូរ និងអ្នកប្រើប្រាស់គ្រឿងញៀនជាង ៦.១០០នាក់ត្រូវបានសម្លាប់ចាប់តាំងពីលោកឡើងកាន់តំណែងកាលពីខែមិថុនា ឆ្នាំ២០១៦។
លោក Duterte បាននិយាយនៅក្នុងកិច្ចប្រជុំប្រចាំឆ្នាំតាមរយ:វីដេអូថា “ជនណាដែលត្រូវបានគេរកឃើញថា បានធ្វើសកម្មភាពហួសព្រំដែនក្នុងអំឡុងពេលប្រតិបត្តិការត្រូវទទួលខុសត្រូវចំពោះមុខច្បាប់របស់យើង”។
លោក Duterte មិនបាននិយាយអំពីការស៊ើបអង្កេតជាផ្លូវការលើឧក្រិដ្ឋកម្មដែលអាចកើតមានប្រឆាំងមនុស្សជាតិឡើយ ដែលត្រូវបានអនុម័តដោយចៅក្រមពីតុលាការព្រហ្មទណ្ឌអន្តរជាតិកាលពីសប្តាហ៍មុន ទោះបីជាលោកបង្ហាញការបដិសេធការជ្រៀតជ្រែកពីខាងក្រៅក្នុងបញ្ហាសិទ្ធិមនុស្សក៏ដោយ។
លោកបាននិយាយថា “យើងបានបញ្ចប់ការងារសព្វគ្រប់ថ្មីៗនេះជាមួយអង្គការសហប្រជាជាតិនូវកម្មវិធីរួមរបស់យើង ស្តីពីសិទ្ធិមនុស្ស។ នេះគឺជាគំរូមួយសម្រាប់ការចូលរួមក្នុងន័យស្ថាបនារវាងរដ្ឋជាសមាជិកអធិបតេយ្យ និងអង្គការសហប្រជាជាតិ” ៕
មតិយោបល់