ភ្នំពេញៈ នៅសៀលថ្ងៃទី៦ ខែតុលា ឆ្នាំ២០១៦នេះលោក រស់ ពិសិដ្ឋ ប្រធានក្រុមប្រឹក្សាចៅក្រមជំនុំជម្រះនៃសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាប់ចោទជាជនជាតិចិនតៃវ៉ាន់ និងខ្មែរចំនួន ៤នាក់ ដាក់ពន្ធនាគារពី៥ឆ្នាំ ទៅដល់អស់មួយជីវិត ក្រោមបទចោទប្រកាន់ ដឹកជញ្ជូន និងជួញដូរ ដោយខុសច្បាប់នូវសារធាតុញៀនប្រភេទ ហេរ៉ូអ៊ីន មេតំហ្វេតាមីនអាយ កាកូអ៊ីន និងអ៊ិចស្តាហ្ស៊ី សរុបចំនួនជិត ១,៥០០ក្រាម និងបទកាន់កាប់អាវុធដោយគ្មានការអនុញ្ញាត ប្រព្រឹត្តកលពីថ្ងៃទី២៤ ខែមករា ឆ្នាំ២០១៦ នៅចំណុចសណ្ឋាគារណាហ្គាវើល ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ បទល្មើសដែលមានចែងឱ្យផ្តន្ទាទោសតាមប្បញ្ញត្តិមាត្រា ៤០នៃច្បាប់ស្តីពីការត្រួតពិនិត្យគ្រឿងញៀន និងមាត្រា ៤៩០នៃក្រមព្រហ្មទណ្ឌ។

តុលាការក៏បានសម្រេចឱ្យបុរសជនជាតិចិនតៃវ៉ានើម្នាក់ទៀតឱ្យរួចផុតពីបទចោទប្រកាន់ទាំងអស់ យោងតាមមាត្រា ៣៥០នៃក្រមនីតិវិធីព្រហ្មទណ្ឌ។
សេចក្តីសម្រេចនៃសាលក្រមបានផ្តន្ទាទោសជនជាប់ចោទដូចខាងក្រោម៖
១. ឈ្មោះ កាំង ជីងឆីវ ភេទប្រុស ជនជាតិចិនតៃវ៉ាន់ (កំពុងរត់គេចខ្លួន) ដាក់ពន្ធនាគារកំណត់រយៈពេលអស់មួយជីវិត ពិន័យជាប្រាក់ ៨០លានរៀលចូលជាថវិការដ្ឋ និងចេញដីកាតាមចាប់ខ្លួនមកអនុវត្តទោសនៅក្នុងពន្ធនាគារ
២. ឈ្មោះ ហង្ស ជីងជីង ភេទស្រី អាយុ ២៥ឆ្នាំ ជនជាតិខ្មែរ ដាក់ពន្ធនាគារកំណត់រយៈពេល ២៥ឆ្នាំ និងពិន័យជាប្រាក់ចំនួន ៤០លានរៀលចូលជាថវិការដ្ឋ។
៣. ឈ្មោះ ហេង សុខសាន ហៅ សាំ ភេទប្រុស អាយុ៤៦ឆ្នាំ ជនជាតិខ្មែរ ដាក់ពន្ធនាគារកំណត់រយៈពេល ៥ឆ្នាំ និងពិន័យជាប្រាក់ចំនួន ២០លានរៀលចូលជាថវិការដ្ឋ។
៤. ឈ្មោះ តៃ ឆីងស៊ីង ភេទប្រុស អាយុ៤៣ឆ្នាំ ជនជាតិចិនតៃវ៉ាន់ ឱ្យរួចផុតពីបទចោទប្រកាន់ និងដោះលែងឱ្យមានសេរីភាពវិញ។

នៅក្នុងសវនាការជនជាប់ចោទឈ្មោះTai Chih Hsing បានបដិសេធថាមិនបាន ដឹងរឿងគ្រឿងញៀនទេ ព្រោះខ្លួនមកកម្ពុជា ដើម្បីទិញឬសថ្នាំចិនសែ។ ជនជាប់ចោទបន្តថា ខ្លួនបានទៅស្នាក់នៅ ណាហ្គាវើល ដោយសារបានស្គាល់ ជនជាតិចិនតៃវ៉ាន់ម្នាក់ ឈ្មោះ កាំង ជីងឆីវ ដែលជាអ្នកជួលបន្ទប់ឲ្យ ស្នាក់នៅតំលៃ១០០ដុល្លារ ក្នុងមួយយប់។ Tai Chih Hsing និយាយថា ឬសថ្នាំចិនសែនេះ មានតម្លៃពី២ម៉ឺន ទៅ៣ម៉ឺនដុល្លារក្នុង១គីឡូក្រាម។
ចំណែកជនជាប់ចោទឈ្មោះ ហេង សុខសាន្ត ហៅ សាំថានៅថ្ងៃចាប់ខ្លួន នគរបាល បានរកឃើញថ្នាំញៀន ប្រភេទមេតំហ្វេតាមីន ហេរ៉ូអ៊ីន និងមានអាវុធខ្លី មួយដើមម៉ាកបេរេតា និងគ្រាប់ចំនួន ១៣គ្រាប់ នៅនឹងខ្លួនគេមែន ប៉ុន្តែឈ្មោះ ហេង សុខសាន ហៅ សាំ បានបដិសេធថា រូបគេមិនបានជួញដូរគ្រឿងញៀនទេ ហើយគ្រឿងញៀន ដែលរកឃើញក្នុងបន្ទប់គាត់ គឺដើម្បីប្រើប្រាស់ ផ្ទាល់ខ្លួនប៉ុណ្ណោះ ចំពោះអាវុធវិញ គឺមានគេយកមកបញ្ចាំ។

ជនជាប់ចោទឈ្មោះ ហង្ស ជីងជីង និយាយថា នៅព្រឹកថ្ងៃ២៤ ខែមករា ឆ្នាំ២០១៦ មានបុរស់ម្នាក់ឈ្មោះ ឆ ជូរ បានទូរស័ព្ទហៅឲ្យនាង ទៅយកកញ្ចប់តែ នៅស្តុបពេទ្យចិន ទៅឲ្យចិនឈ្មោះ កាំង ជីងឆីវ នៅណាហ្គាវើល។ ជីងជីង បានបដិសេធថា ខ្លួនមិនពាក់ព័ន្ធគ្រឿងញៀនទេ ហើថាហេតុផលមួយទៀត ដែលគាត់ទៅយកកញ្ចប់តែនោះ ដោយសារគាត់ត្រូវទៅ ទារលុយពីបុរសជនជាតិ តៃវ៉ាន់ ឈ្មោះ កាំង នោះក្រោយពីគាត់ បានដេកជាមួយនាង កាលពីយប់ដោយឈ្មោះ កាំង បានសន្យាឲ្យតម្លៃខ្លួន២០០ដុល្លារ។

តាមលទ្ធផលពិសោធន៍ ដែលបានអានក្នុងសវនាការ គ្រឿងញៀនប្រភេទមេតំហ្វេតាមីន (ម៉ាទឹកកក) និងហេរ៉ូអ៊ីន ត្រូវបានបែងចែកជា បួនសំណាក ដោយសរុបទាំងអស់ចំនួនជិត ១,៥០០ក្រាម ហើយសំណាក នីមួយៗសុទ្ធតែ មានសារធាតុញៀនទាំងអស់៕

https://youtu.be/GIpa9t0xXp0