ផ្ទះ ព័ត៌មានជាតិ លោក ស៊ុត ឌីណា...

លោក ស៊ុត ឌីណា នឹងត្រូវតុលាការប្រកាសទោស នៅដើមខែក្រោយ

0

ភ្នំពេញ: ក្រោយពីបើកសវនាការលើអង្គសេចក្តី សាកសួរដេញដោលអស់រយ:ពេលប្រមាណជា ២ម៉ោងនៅព្រឹកថ្ងៃទី៤ ខែវិច្ឆិកា ឆ្នាំ២០១៦នេះ លោក កោ វណ្ឌី ប្រធានក្រុមប្រឹក្សាចៅក្រមជំនុំជម្រះ បានសម្រេចលើកពេលប្រកាសសាលក្រមសំណុំរឿង លោក ស៊ុត ឌីណា ទៅព្រឹកថ្ងៃទី១ ខែធ្នូ ឆ្នាំ២០១៦ ខាងមុខ។

លោក ស៊ុត ឌីណា អាយុ ៤៥ឆ្នាំ អតីតឯកអគ្គរាជទូតខ្មែរប្រចាំប្រទេសកូរ៉េខាងត្បូង ត្រូវបាន លោក សៀង សុខ តំណាងអយ្យការចោទប្រកាន់ចំនួន ២បទល្មើស ទី១បទ កេងយកប្រយោជន៍ដោយខុសច្បាប់ យោងតាមមាត្រា៥៩៧ និងមាត្រា៥៩៨ នៃក្រមព្រហ្មទណ្ឌ និងទី២បទ រំលោភអំណាច យោងតាមមាត្រា៣៥ ច្បាប់ស្ដីពី ការប្រឆាំងអំពើពុករលួយ។

នៅក្នុងសវនាការនាព្រឹកនេះលោក ស៊ុត ឌីណា បានថ្លែងថា លោកពិតជាបានយកលុយ ថ្លៃទិដ្ឋការ ចំនួន ១១៦,៩៩៥ ដុល្លារ ដែលត្រូវបញ្ជូនទៅក្រសួងសេដ្ឋកិច្ច និងហិរញ្ញវត្ថុជាចំណូលជាតិ ទៅចំណាយលើថ្លៃអគារស្ថានទូត និងចំណាយរដ្ឋបាលនានាក្នុងស្ថានទូតប្រាកដមែន ព្រោះតែស្ថានទូតមិនទាន់មានប្រាក់បង្វិលលើការចំណាយ។ ប៉ុន្តែលុយទាំងអស់នឹងត្រូវសងក្រសួងសេដ្ឋកិច្ច និងហិរញ្ញវត្ថុវិញនៅពេលក្រសួងការបទេស ផ្តល់ខ្ទង់ចំណាយទៅឲ្យស្ថានទូត។

លោកបន្តថា ក្រោយពេលលោកទទួលតំណែងជាឯកអគ្គរាជទូតថ្មីនៅប្រទេសកូរ៉េខាងត្បូងនោះ គឺស្ថានទូតបានជំពាក់លុយថ្លៃអគារមួយចំនួន រហូតដល់ម្ចាស់អគារចង់បញ្ឈប់ការជួលអគារនោះឲ្យថែមទៀតផង។ ជាងនេះទៅទៀត គ្រាដែលលោកមកកាន់តំណែងនោះ ស្ថានភាពនៃការចំណាយមុនៗហាក់មិនមានភាពច្បាស់លាស់ឡើយ ទើបលោកបង្ខំចិត្តយកលុយ រដ្ឋនោះប្រើសិនដើម្បីដោះស្រាយបញ្ហាចំពោះមុខ។ លោក ស៊ុត ឌីណា បានទទួលស្គាល់ថា លោកបានបង្កើតគណនីធានាគារចំនួន២ ដោយមានគណនីជាប្រាក់ដុល្លារ និងប្រាក់វ៉ុន ប៉ុន្តែគណនីទាំងនោះជាគណនីរបស់ស្ថានទូត មិនមែនជាកម្មសិទ្ធិផ្ទាល់ខ្លួនលោកទេ។

យោងតាមអំណានចម្លើយសាក្សីចំនួន ៤នាក់បានបញ្ជាក់ថា លោក ស៊ុត ឌីណា បានប្រើតែបក្ខពួកឲ្យធ្វើការ ដោយ មិនបានប្រើពួកគេឲ្យធ្វើការងារដែលពួកគេទទួលខុសត្រូវ ឡើយ។ សក្សីអះអាងថា ចំពោះប្រាក់សពពលករខ្មែរដែលត្រូវក្រុមហ៊ុនធានារ៉ាប់រងសងនោះ លោក ស៊ុត ឌីណា បានតម្រូវឲ្យក្រុមហ៊ុនបង្វិលចូលគណនីធនសគាររបស់លោកផ្ទាល់ មិនចាំបាប់សងទៅគ្រួសារជនរងគ្រោះផ្ទាល់នោះទេ។

សូមបញ្ជាក់ថា សវនាការនាព្រឹកនេះ មិនបានលើកឡើងអំពីលុយសុទ្ធប្រមាណ ៧,២លានដុល្លារអាមេរិក មាស ១២,៧៤គីឡូក្រាម មានផ្ទះវីឡា ២កន្លែង ដីជាង១០កន្លែង និងប្រាក់ក្នុងធានាគារជាច្រើនទៀត ដូចសេចក្តីប្រកាសព័ត៌មានរបស់អង្គភាពប្រឆាំងអំពើពុករលួយ និងការបំភ្លឺរបស់ប្រធានអង្គភាពប្រឆាំងអំពើពុករលួយ លោក ឱម យិនទៀង នៅអំឡុងពេលឃាត់ខ្លួនលោក ស៊ុត ឌីណា នោះទេ។

គួររំឭកថា លោក ស៊ុត ឌីណា ត្រូវបាន អង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី៤ ខែមេសា ឆ្នាំ២០១៦ និងត្រូវបានលោក លាង សំណាត់ចៅក្រមស៊ើបសួរលោសាលាដំបូងរាជធានីភ្នំពេញ សម្រេចឃុំខ្លួនកាលពីរសៀលថ្ងៃទី៧ ខែមេសា ឆ្នាំ២០១៦៕

tulaka

tulaka

Loading...