គ្រូ​បង្វឹក​ក្រុម Cambodian All Stars ​ក៏ដូច​ជា​គ្រូ​បង្វឹក​ក្រុម​ U-23 កម្ពុជា​លោក Leonardo Vitorino ​បាននិយាយក្រោយចប់ការប្រកួតជាមួយក្រុម SCG​ Muangthong​ United ថាការប្រកួតជាមួយក្រុមថៃនេះវាមិនសំខាន់ទេ យើងផ្តោតតែទៅលើការប៉ះក្រុមខ្លាំង U-23 ​របស់​ចិន​ដែល​ត្រូវជួបគ្នា​នៅ​ថ្ងៃ​ទី​១៩ ខែ​​កក្កដា ឆ្នាំ​២០១៧ ​នៅ​ពហុ​កីឡដ្ឋាន​ជាតិ​ក្នុងវគ្គ​​ជម្រុះ 2018 AFC U-23 Championship។

​គ្រូ​បង្វឹក​សញ្ជាតិ​ប្រេស៊ីល​​រូប​នេះ​បានលើកឡើងថា៖ ​«ខ្ញុំ​បាន​តាម​ដាន​ការ​ប្រកួតរបស់ក្រុម​ U-23 ចិន​ នៅ ២​ប្រកួត​ចុង​ក្រោយរបស់គេ​ ឃើញថា​មានខ្សែ​បម្រើ​កណ្ដាល​​ម្នាក់ លេងបានល្អដែលជាបញ្ហាសម្រាប់ក្រុមកម្ពុជា ព្រោះគេ​​ចែក​បាល់​បានច្បាស់ល្អ និង​មាន​ភាព​​ឆ្លាតវៃ​​ក្នុង​ការ​លេង ក្រៅ​ពី​នេះ​ក្រុម​ខ្លាំង​របស់​អាស៊ី​មួយ​នេះ​មាន​ខ្សែ​ប្រយុទ្ធ​​ដ៏​រឹង​មាំ​ ដែល​មាន​បទ​ពិសោធន៍លេង​នៅ​តំបន់​អឺរ៉ុប»។ ហើយគ្រូបង្វឹកដដែលបានបន្តថា ​កីឡាករ U-23 ​កម្ពុជា​ ​ត្រូវ​តែ​មាន​ល្បឿន​លឿន ដើម្បី​តាមឲ្យ​ប្រកៀកជាមួយ​ដៃ​គូ​​ ​កីឡាករ​ U-23 កម្ពុជានៅមាន​​ចំណុច​ខ្វះខាត​មួយ​ចំនួន​​ដែល​ត្រូវ​កែប្រែ ទន្ទឹម​នឹង​នេះ​ក៏​អាច​​មាន​កីឡាករ​ខ្លះ​ត្រូវ​កាត់ចេញ​ពី​បញ្ជី​ផង​ដែរ ព្រោះខ្ញុំបាន​ធ្វើតេស្ត​​កីឡាករ​ U-23 កម្ពុជា​ ក្នុងជំនួបជាមួយ SCG​ Muangthong​ United ​រួចមកហើយ។

សូមបញ្ជាក់ផងដែរថា នៅថ្ងៃទី១៩ ខែកក្កដា ឆ្នាំ២០១៧ ស្អែកនេះ ក្រុមជម្រើសជាតិកម្ពុជាអាយុក្រោម ២៣ឆ្នាំ និងត្រូវប៉ះ ក្រុមជម្រើសជាតិចិនអាយុក្រោម ២៣ឆ្នាំ ​ក្នុងវគ្គ​​ជម្រុះ 2018 AFC U-23 Championship នាវេលាម៉ោង ៦និង៣០ នាទីល្ងាច នៅពហុកីឡដ្ឋានជាតិ ខណៈដែលទូរទស្សន៍ BTV News ធ្វើការផ្សាយផ្ទាលផងដែរ៕