ក្រុមយក្ស Barcelona មិនទាន់ចុះចាញ់ ក្នុងសមរភូមិ ដោះដូរកីឡាករឡើយ ខណៈពេលនេះ ក្លិបជើងខ្លាំងអេស្ប៉ាញមួយនេះ បានបន្ថែមទឹកប្រាក់ច្រើនជាងមុន ក្នុងការទិញយកខ្សែបម្រើប្រយុទ្ធ Philippe Coutinho ពីក្រុមហង្សក្រហម Liverpool ។

នេះគឺជាការ តាមប្រមាញ់ ជាថ្មីម្តងទៀតហើយ របស់ក្រុម Barcelona បន្ទាប់ពីទទួលបានការ បដិសេធ ម្តងជាពីរ ដងពីសំណាក់ក្រុមហង្សក្រហម Liverpool។ យ៉ាងណាវិញ ប្រភព​ Daily Star បានឲ្យដឹងថា ការបរាជ័យប៉ុន្មានលើក កន្លងមកនេះ មិនទាន់ធ្វើឲ្យក្រុមអ្នកមានបុណ្យ Barcelona រួញរាឡើយ ខណៈក្រុមអេស្ប៉ាញមួយនេះ បានបន្ថែមតម្លៃទិញ Philippe Coutinho រហូតដល់ទៅ ៨០លានផោន។ ជាក់ស្តែងណាស់ កាលពីដំបូង ក្រុម Barcelona ចង់ទិញ Coutinho ត្រឹមតម្លៃ ៦០លានផោនប៉ុណ្ណោះ ក៍ប៉ុន្តែក្រោយពីត្រូវបានបដិសេធពី Liverpool ក្រុម Barcelona បានបង្វែរគោលដៅទៅរកខ្សែបម្រើ Marco Veratti វិញ​ តែត្រូវបានបដិសេធពីក្រុម Paris Saint Germain ដែរ។

ដោយហេតុនេះហើយ Barca បានបែរមកទិញ Coutinho ជាថ្មីម្តងទៀត ក្នុងតម្លៃ ៧២លានផោន តែត្រូវបរាជ័យ ម្តងទៀត ដោយក្រុម Liverpool មិនលក់ដដែល។ ដូច្នេះហើយ ចុងក្រោយនេះ ក្រុមអ្នកមានបុណ្យ Barcelona បានសម្រេចតម្លើងថ្លៃទិញ Philippe Coutinho រហូតដល់ទៅ ៨៩លានផោន ដោយសង្ឃឹមថា ក្រុមហង្សក្រហម Liverpool នឹងយល់ព្រមលក់ខ្សែបម្រើប្រយុទ្ធវ័យ២៥ឆ្នាំ ប្រេស៊ីលរូបនេះ។

គួរបញ្ជាក់ផងដែរថា Barcelona តាមប្រមាញ់ Coutinho នេះ គឺដើម្បីយកទៅជំនួស Andre Ineista ដែលកំពុងត្រៀមចូលនិវត្តន៍ពីពិភពបាល់ទាត់ ក្នុងពេលដ៍ខ្លីខាងមុខនេះ។