ក្រុមមាន់ខ្នាយមាស Tottenham Hotspur បានតំឡើងថ្លៃលក់ ខ្សែបម្រើប្រយុទ្ធវ័យក្មេង Dele Ali រហូតដល់ទៅ ១៥០លានផោន ដែលធ្វើឲ្យ ក្រុម Man City មិនហ៊ានទិញ ស្របពេលដែល Barcelona កំពុងរារែកចិត្ត។

បន្ទាប់ពីទម្រង់លេងរបស់ក្រុម Barcelona មានការធ្លាកចុះ ច្រើនបន្ទាប់ពីការចាកចេញរបស់ខ្សែប្រយុទ្ធឆ្នើម Neymar នោះ បានធ្វើឲ្យក្រុមយក្សអេស្ប៉ាញមួយនេះ តាមប្រមាញ់កីឡាករជាច្រើនរូប។ យ៉ាងណាវិញ បើតាម The Sun បានឲ្យដឹងថា ក្រុម Spurs បានតំឡើងថ្លៃលក់ Dele Ali ខ្ពស់មែនទែន រហូតដល់ទៅ ១៥០លានផោន សម្រាប់ការឆ្លើយតបទៅនឹងការតាមប្រមាញ់ របស់ Barcelona នោះ។

ជាការពិតណាស់ ក្រុម Barcelona ក៍មានបំណងចង់បាន Ali ពីក្រុម Tottenham ដែរ ដើម្បីយកទៅជំនួសតំណែងរបស់ Neymar ដែលមិនទាន់មានកីឡាករណាសាកសមនោះ។ មិនត្រឹមតែចង់បាន Ali នោះទេ ក្រុម Barcelona បសនសម្លឺងឃើញ Ousmane Dembele និង Philippe Coutinho រួមមានកីឡាករជាច្រើនទៀត តែ ក្រុមអេស្ប៉ាញមួយនេះ មិនទាន់ទទួលភ្លើងខៀវ ចំពោះកីឡាករណាមួយនោះឡើយ។ បន្ថែមលើនេះ មានតែក្រុមទាំងអស់ បានតំឡើងតម្លៃខ្លួនកីឡាករ ដែល Barcelona ចង់បាននោះ។ ជាក់ស្តែងណាស់ Tottenham ក៍ជាក្រុមមួយដែលបានតំឡើង ថ្លៃលក់ Dele Ali រហូតដល់ទៅ ១៥០លានផោន ដែលអាចជាតម្លៃ ថ្លៃលំដាប់ទី២ បន្ទាប់ពី Neymar ។

យ៉ាងណាវិញ នៅមិនទាន់មានការប្រតិកម្មណាមួយ ពីក្រុម Barcelona នៅឡើយទេ ព្រោះថា ក្រុមនេះ កំពុងតែត្រដាបត្រដួស ក្នុងការស្វែងរក កីឡាករជំនួសតំណែង Neymar ។ ដូច្នេះហើយ រង់ចាំមើលថា តើ ក្រុម Barcelona ហ៊ានចំណាយលុយយ៉ាងច្រើន លើសលប់បែបនេះ ដើម្បីទិញយក Dele Ali ឬទេ?